«Nasieńnie ad Baćki». Dziaŭčynka, jakoj uručyli kostački kavuna ad Łukašenki, akazałasia nie prostaj školnicaj, a dačkoj miascovaha funkcyjaniera
Šou ź pieradačaj nasieńnia kavunoŭ ad Łukašenki zładzili ŭ Homielskim abłvykankamie. Aficyjna paviedamlałasia, što 9-kłaśnica Karyna Muraška z Homielskaha rajona napisała list Łukašenku, u jakim paprasiła nasieńnie kavuna z łukašenkaŭskaj bachčy — toj na prośbu adhuknuŭsia. Raspaviadaje «Fłahštok».
Karyna Muraška z baćkami ŭ abłvykankamie. Tvar niepaŭnaletniaj zablurany Fłahštokam. Fota: Homielski abłvykankam
Staršynia abłvykankama Ivan Krupko asabista pieradaŭ dziaŭčyncy «nasieńnie ad Baćki», a pačałosia šou jašče napiaredadni. Spačatku pakazali pres-sakratarku Łukašenku Natallu Ejsmant, jakaja ŭručaje nasieńnie Krupko. Potym — školnicu Karynu, jakaja tak adčuła hetuju navinu, što «sa ślazami na vačach» hladzieła videa pieradačy nasieńnia.
Pastanoŭka praciahnułasia ŭ abłvykankamie, kudy paklikali dziaŭčynku i jaje baćkoŭ. Pryvodziacca słovy baćki školnicy Dźmitryja Muraški:
«List prezidentu Karyna napisała sama ŭ siaredzinie lutaha, vielmi chacieła pavinšavać jaho ź pieramohaj na vybarach. Nas tolki paprasiła dapamahčy znajści adras. Adkaz pryjšoŭ vielmi chutka, vy bačyli emocyi dački».
Pry hetym u aficyjnych paviedamleńniach umoŭčali, kim źjaŭlajecca Dźmitryj Muraška. Ale jaho paznaŭ «Fłahštok» — heta byvały kanjunkturščyk, kiraŭnik abłasnoj arhanizacyi Biełaruskaha prafsajuza rabotnikaŭ budaŭnictva i prambudmateryjałaŭ, pieršy sakratar abłasnoha kamiteta KPB, deputat Ułukaŭskaha sielsavieta. A akramia taho — eks-siłavik, jon skončyŭ akademiju MUS.
Dźmitryj Muraška na zborach terytaryjalnych vojskaŭ. Fota: sacsietki
Siamja žyvie va Ułukoŭi, Karyna vučycca ŭ Hałavinskaj siaredniaj škole, źjaŭlajecca členam atrada junych miratvorcaŭ i BRSM.
Dźmitryj Muraška. Fota: sacsietki
U paviedamleńni abłvykankama havorycca, što dziaŭčynka i jaje baćki «ŭdzielničajuć u patryjatyčnych akcyjach, dziaržaŭnych śviatach, a pa viečarach hladziać televizar».