Z 1 krasavika «Radyjo Svaboda» častkova zhortvaje dziejnaść. Usie žurnalisty pražskaj redakcyi sychodziać u adpačynak

Biełaruskaja słužba «Radyjo Svabody» papiaredziła čytačoŭ pra značnaje skaračeńnie jak kamandy redakcyi, tak i rehularnych prahram.

Praź źmianšeńnie finansavańnia na paŭzu stanoviacca prajekty vydańnia «PiK Svabody», «Tłumačym z Hurnievičam», «Historyja na Svabodzie» i «Kudy kocicca śviet».

Skrynšot pieradačy «Tłumačym z Hurnievičam» / YouTube

Redakcyja adznačyła, što zroblena tak, bo Radyjo Svabodnaja Jeŭropa / Radyjo Svaboda «čakaje aficyjnaha paćvierdžanaja ad USAGM ab adnaŭleńni hrantavaha finansavańnia». Adpaviedna, kampanija nie maje naležnych srodkaŭ dla paŭnavartasnaj pracy.

Častka kamandy «Radyjo Svabody» pa toj ža pryčynie znachodzicca ŭ adpačynku. Adna z papularnych viadučych, Hanna Soŭś, paviedamiła ŭ fejsbuku, što ŭsie žurnalisty pražskaj redakcyi sychodziać u vymušany adpačynak.

«Bližejšym časam publikacyj na našych płatformach stanie prykmietna mienš», — papiaredzili žurnalisty.

15 sakavika Ahienctva hłabalnych miedyja ZŠA (USAGM) zajaviła ab spynieńni hrantu dla Radyjo Svabodnaja Jeŭropa / Radyjo Svaboda (RSIE/RS). Ukaz zaklikaŭ da skaračeńnia siami fiederalnych ahienctvaŭ — u tym liku USAGM — da «maksimalnaj stupieni, jakaja adpaviadaje dziejnamu zakanadaŭstvu».

18 sakavika RSIE/RS padała pazoŭ u sud na Ahienctva ZŠA pa hłabalnych miedyja, a taksama na słužbovych asob arhanizacyi Kery Lejk i Viktara Maralesa, kab zabłakavać ich sproby spynić dziejańnie zaćvierdžanaha Kanhresam ZŠA hranta, vydzielenaha na pracu arhanizacyi.

26 sakavika USAGM napisała Radyjo Svabodnaja Jeŭropa / Radyjo Svaboda, što skasoŭvaje svaju zajavu ab spynieńni hrantu ad Kanhresu, vydadzienuju 15 sakavika, ale padkreśliła, što zachoŭvaje za saboj prava spynić vydzialeńnie hetaha hrantu ŭ budučyni.

Kamientary da artykuła