U Hiermanii palicyja ačapiła rajon i piać hadzin viała rasśledavańnie zabojstva. Akazałasia, heta była seks-lalka

Mužčyna vyhulvaŭ sabaku i zaŭvažyŭ na budplacoŭcy žanočaje cieła. Na miesca vyklikali kryminalistaŭ, apierataraŭ dronaŭ, sudmiedekśpiertaŭ i navat rytualnuju słužbu. 

Skrynšot videa NDR

Viečaram u subotu ŭ palicyju horada Rostak na paŭnočnym uschodzie Hiermanii pastupiŭ ekstranny vyklik. Mužčyna hulaŭ z sabakam i natknuŭsia na abharełaje žanočaje cieła.

Na miesca zdareńnia vyjechali ŭsie najaŭnyja palicejskija słužby, uklučajučy śledčych pa zabojstvach, kryminalistaŭ i sudmiedekśpiertaŭ, a taksama apierataraŭ dronaŭ z 3D-skanieram. 

Rajon ačapili, pažarnyja aśviacili miesca mahutnymi pražektarami, palicejskija fatahrafavali dokazy, a śledčyja pa spravach ab zabojstvach prasoŭvalisia da mierkavanaha cieła litaralna pa santymietry, vymiarajučy jaho ruletkaj i dakumientujučy danyja, piša NDR.

Praź piać hadzin palicejskija padyšli ŭščylnuju da «achviary». Adzin sa śledčych dakranuŭsia da «trupa» i adrazu zrazumieŭ, što heta nie čałaviek — abjekt byŭ vyrableny ź sintetyčnych materyjałaŭ.

Akazałasia, što heta była realistyčnaja seks-lalka. Jaje abpalili, a potym upakavali ŭ sumku Ikea i vykinuli na dvor. Śledčyja miarkujuć, što chtości zrabiŭ heta śpiecyjalna, paviedamlaje Daily Mail.

Skrynšot videa: NDR

Na toj momant na miesca paśpieła prybyć rytualnaja słužba, jakaja pavinna była advieźci cieła ŭ morh. Supracoŭnikaŭ daviałosia adpuścić, palicyja zabrała lalku dla ŭtylizacyi. Rasśledavańnie było spyniena. 

Palicejskija na miescy zdareńnia pryznalisia, što nikoli raniej nie sutykalisia z takim dziŭnym vypadkam za ŭsiu svaju karjeru.

Kamientary da artykuła