Vice-premjer, Karpienka, Dziermant i kamunisty adznačyli «Dzień Sonca nacyi» ŭ pasolstvie KNDR
Uskładańnie kvietak da ścienki z partretami, uračystyja pramovy i lohkija zakuski arhanizavali supracoŭniki pasolstva KNDR u Minsku dla vysokapastaŭlenych haściej u piatnicu viečaram 11 krasavika. Takim čynam sabranyja adznačyli dzień naradžeńnia Kim Ir Siena, jakoha ŭ Paŭnočnaj Karei nazyvajuć «Soncam nacyi».
Kamunisty ŭskładajuć kvietki da ścienki z partretami na fonie lohkich zakusak. Fota: pres-słužba KPB.
Pavodle aficyjnaj viersii, Kim Ir Sien naradziŭsia 15 krasavika 1912 hoda. Hety dzień nazvany «Dniom Sonca» i z 1997 hoda adznačajecca jak dziaržaŭnaje śviata.
Spravazdaču pra viečarynu apublikavała pres-słužba Kamunistyčnaj partyi Biełarusi, źviarnuŭ uvahu Reform.news.
Miarkujučy pa fota, u mierapryjemstvie ŭdzielničali nie tolki kamunisty, ale i vysokapastaŭlenyja čynoŭniki — namieśnik premjer-ministra pa sielskaj haspadarcy Juryj Šulejka i kiraŭnik Centralnaj vybarčaj kamisii Ihar Karpienka.
Pieršy sakratar CK KPB Siarhiej Syrankoŭ začytaŭ ad imia Biuro CK KPB vinšavańnie z hetym śviatam — Dniom Sonca. Kim Čen Yna Syrankoŭ nazvaŭ pierajemnikam i pradaŭžalnikam spravy dzieda i baćki.
