Dzieci pad Homielem stali hadavać u siabie doma bahamołaŭ. Navošta?
U ahraharadku Jaromina Homielskaha rajona vučni miascovaj škoły zajmajucca vielmi niezvyčajnaj dziejnaściu — hadujuć takich nietradycyjnych dla Biełarusi kazurak, jak bahamoły, piša rajonnaja hazieta «Majak».
Fota Maksima Šastakova
Ekśpierymient pačaŭsia kala dvuch hadoŭ tamu, kali nastaŭnik Maksim Šastakoŭ razam z vučniem Arturam Malikavym pačali zajmacca vyviadzieńniem pieršych asobin.
U 2023 hodzie Arturu i jahonamu siabru Viačasłavu Sibilevu ŭdałosia atrymać ad złoŭlenych kazurak kala 30 kokanaŭ (aatek), ź jakich tearetyčna pavinny byli vyłupicca na śviet tysiača-paŭtary karysnych dla sielskaj haspadarki drapiežnikaŭ.
Śpiarša chłopcam udałosia vyvieści kala dziasiatka bahamołaŭ, jakija pry naradžeńni byli nie bolšyja za kamara.
Fota Maksima Šastakova
Paśla, praŭda, praź niedahlad adnaho z udzielnikaŭ ekśpierymientu pry adnoj ź pieravozak amal usie kazurki zahinuli, cudam uratavałasia tolki adna asobina.
Mnohija mierkavali, što z hetaha ŭžo ničoha nie budzie, ale ŭ vieraśni ŭdzielnikaŭ ekśpierymientu čakaŭ siurpryz. Mała taho, što bahamoł vyžyŭ, jon jašče i spakojna vyras u biełaruskich umovach.
Paśla hetaha vyviadzieńnie niezvyčajnaj dla našych šyrot kazurki praciahnułasia. Školnikam užo ŭdałosia vyvieści 11 asobin, jakich płanujuć vypuścić na nievialikuju terytoryju prysiadzibnaha ŭčastka. Zatym jany buduć vyvučyć toje, jak źmienicca ŭradžajnaść miascovych kultur, bo bahamoły charčujucca roznymi škodnikami.
Fota Maksima Šastakova
U płanach dziaciej na budučyniu — prapanavać svaje napracoŭki NAN Biełarusi, kab pavialičyć maštab ekśpierymientu. Ich nastaŭnik Maksim Šastakoŭ padkreślivaje, što ŭ vypadku pośpiechu jość realnaja mahčymaść zamianić chimičnyja sposaby baraćby z škodnikami bijałahičnymi, što maje adbicca na jakaści kultur.
Čytajcie taksama:
U Zasłaŭi mužčyna znajšoŭ na svaim učastku kazurku, jakuju ŭ Biełarusi bačać pakul redka