Pierasyłka ryłsa ŭ instahramie moža vas vydać. Hetuju funkcyju nielha adklučyć, ale možna abaranić siabie — voś jak

Ź niadaŭniaha času instahram pačaŭ dadavać u spasyłki z materyjałami, jakimi vy dzieliciesia, spasyłku na vaš akaŭnt, na jaki prapanujuć padpisacca. Heta moža być niebiaśpiečna, kali vy chočacie zachavać pryvatnaść (i tym bolš ananimnaść). Kali ŭ TikTok heta možna adklučyć, to ŭ instahramie — nie. Ale kali być uvažlivym, to možna abaranić svaju pryvatnaść.

Kali vy skapirujecie niešta, čym chočacie padzialicca (naprykład, videa «Našaj Nivy») u instahramie i skapirujecie spasyłku na publikacyju praz prahramu instahrama (naprykład, na androidzie ci ajfonie), a paśla dašlecie jaje niekamu, nie redahujučy, to jana budzie mieć taki vyhlad:

https://www.instagram.com/reel/DIYMVTboJ7M/?igsh=************==

To-bok, u jaje dadajecca paramietr igsh. Heta dazvalaje pabačyć, ź jakoha mienavita akaŭnta było rasšeranaje videa. Heta moža być prablemaj, asabliva kali vy rasšeryli niešta ŭ publičnym čacie abo vialikaj supołcy. Vizualna heta vyhladaje tak:

Admietna, što kali abrać opcyju «Share» ŭ instahramie, to ŭ lubym vypadku spasyłka budzie mieć hety dadatkovy chvost. A ŭ vypadku z Telegram spasyłka budzie adrazu dasłanaja z paramietram igsh, jakija dazvalaje pabačyć vaš akaŭnt (Whatsapp chacia b daje mahčymaść redahavać spasyłku).

Funkcyi, z dapamohaj jakich možna padzialicca spasyłkaj. Kali vy abieracie «Share», to spasyłka budzie z dadatkovaj opcyjaj, jakaja dazvalaje pabačyć vaš akaŭnt i dašlecca ź im.

Adziny šlach, jak možna nadziejna abaranicca, davoli taporny. Kali vy chočacie padzialicca spasyłkaj na niešta, to spačatku skapirujcie jaje ŭ prahramie instahrama z dapamohaj funkcyi Copy link (skapiravać spasyłku), paśla ŭstaŭcie tudy, dzie chočacie joj padzialicca, i ŭručnuju vydalicie ŭsio, što znachodzicca paśla simvałaŭ «?igsh=» razam ź imi.

Voś jak budzie vyhladać u takim vypadku spasyłka na adno ź videa «Našaj Nivy» (zaŭvažcie, što tam niama ničoha paśla simvała «/», hetaja častka vydalenaja — i heta adzinaje, što źmianiłasia):

https://www.instagram.com/reel/DIYMVTboJ7M/

Kali častku z paramietram igsh nie vydalić, to surazmoŭcu pa zmoŭčańni budzie vidać, ź jakoha akaŭntu vy raspaŭsiudzili videa. Nijakich naład, jakija b dazvalali vyklučyć hetuju funkcyju, nie isnuje.

Kamientary da artykuła