Stvareńnie ahulnaha rynku naftapraduktaŭ Biełarusi i Rasii pieranieśli na hod
Ahulny rynak nafty i naftapraduktaŭ Biełarusi i Rasii źjavicca paźniej zapłanavanaha. Jaho stvareńnie pieranieśli na 1 studzienia 2027 hoda, zajaviła namieśnica staršyni kancerna «Biełnaftachim» Śviatłana Huryna na pasiadžeńni Pałaty pradstaŭnikoŭ.
Fota ilustracyjnaje
Deputaty ratyfikavali pratakoł da pahadnieńnia pamiž Biełaruśsiu i Rasijaj u halinie ekspartu nafty i naftapraduktaŭ.
«My viadziem pastajanny dyjałoh z našym stratehičnym partnioram — Rasijskaj Fiederacyjaj — nakont stvareńnia ahulnaha rynku nafty i naftapraduktaŭ. Hetaja praca paetapnaja, bo ŭ kožnaj z krain sfarmiravanaja svaja sistema pracy na hetym rynku, i jana patrabuje ŭzvažanaha padychodu. Abmierkavaŭšy hetyja pytańni ŭ miežach raniej raspracavanych sajuznych prahram, baki pryjšli da vysnovy, što patrebna dadatkovaja padrychtoŭka, tamu termin pieraniesieny na 1 studzienia 2027 hoda», — zajaviła Śviatłana Huryna.
Raniej Rasieja i Biełaruś płanavali stvaryć ahulny naftavy rynak nie paźniej za 2025 hod.
Siońnia deputaty pryniali zakonaprajekt ab ratyfikacyi Pratakoła ab uniasieńni źmianieńniaŭ u Pahadnieńnie pamiž uradam Respubliki Biełaruś i uradam Rasijskaj Fiederacyi ad 12 studzienia 2007 hoda, što rehuluje handlova-ekanamičnaje supracoŭnictva ŭ halinie ekspartu nafty i naftapraduktaŭ. Pratakoł byŭ padpisany ŭ Minsku 6 śniežnia 2024 hoda.
Śviatłana Huryna padkreśliła, što płany stvareńnia ahulnaha rynku z 2027 hoda tłumačać terminy, paznačanyja ŭ pratakole.
Jana dadała, što pratakoł zakładaje hnutki miechanizm — kali spatrebicca dadatkovaje pieraniasieńnie terminaŭ u 2027 hodzie, heta možna budzie zrabić bieź źmien u dakumientach.
Čytajcie taksama:
Jeŭrapiejskija kampanii z-za palityki Trampa mohuć viarnucca da supracoŭnictva z «Hazpramam»
Trampavy myty vyzvalili rasijskuju naftu ad zachodnich sankcyj
U Minpryrody raskazali, na kolki hadoŭ Biełarusi chopić zapasaŭ nafty i kaliju