U Niderłandach zabity finansist, jaki raskazaŭ pra admyvańnie hrošaj, arhanizavanaje ŭ minskim H Casino
U pryharadzie Haahi byŭ zabity 41-hadovy hramadzianin Turcyi Džemil Anał. Raniej jon zajaŭlaŭ, što jaho žyćcio pad pahrozaj z-za najaŭnaści infarmacyi pra chabarnictva vysokapastaŭlenych tureckich palitykaŭ. Na publikacyju vydańnia Follow the Money źviarnuŭ uvahu Biełaruski rasśledavalnicki centr.
H Casino ŭ Minsku. Fota tripadvisor.ru
Paviedamlajecca, što Anała zastrelili ŭviečary ŭ čaćvier na terasie hatela ŭ horadzie Rajśviejk. Niderłandskaja palicyja paćvierdziła, što raspačataje rasśledavańnie zabojstva, adnak padazravany pakul nie zatrymany.
Raniej u intervju ŚMI Anał śćviardžaŭ, što maje dokazy karupcyi siarod tureckich čynoŭnikaŭ i što ŭłady Turcyi damahalisia jaho ekstradycyi ŭ suviazi z zabojstvam Chaliła Faljały ŭ 2022 hodzie — upłyvovaha ŭładalnika kazino i mierkavanaha kryminalnaha aŭtaryteta na Paŭnočnym Kipry. Mužčyna admaŭlaŭ abvinavačvańni i zajaŭlaŭ, što sapraŭdnaj pryčynaj pieraśledu stała jahonaja daśviedčanaść pra nielehalnyja finansavyja schiemy.
Džemil Anał zajmaŭ pasadu finansavaha dyrektara ŭ struktury kłana Faljały z Paŭnočnaha Kipra.
Palicyja Niderłandaŭ aryštavała Anała ŭ śniežni 2023 hoda na padstavie mižnarodnaha ordara na aryšt, vydadzienaha Turcyjaj. Z turmy jon raspavioŭ žurnalistam pra hłabalny sindykat anłajn-kazino, źviazany z Faljały.
U pryvatnaści, jon paviedamiŭ, što Chalil Falały razam z partnioram Mustafam Šenieram adkryli H Casino ŭ Minsku dla admyvańnia hrošaj.
Žurnalisty Biełaruskaha rasśledčyckaha centra pryjšli da vysnovy, što klučavyja punkty jahonych śviedčańniaŭ, u tym liku suviaź pamiž tureckim kryminalitetam i ŭładalnikami H Casino, šmatmiljonny abjom hłabalnaj schiemy admyvańnia srodkaŭ i znajomstva ŭładalnikaŭ i dyrektara ź biełaruskimi siłavikami — u tym liku z achoŭnikam Alaksandra Łukašenki, praŭdzivyja.