«Heta niešta žudasnaje». Delehacyja čynoŭnikaŭ pryjšła pavinšavać 103-hadovaha lažačaha vieterana
Videaspravazdača vyklikała nieadnaznačnuju reakcyju karystalnikaŭ sacsietak.
Kiraŭnik Minskaha rajona Uładzimir Jurhievič pryjšoŭ u hości da 103-hadovaha vieterana Ivana Surviły. Jamu praśpiavali pieśniu «Dzień pieramohi» i pavinšavali z 9 Maja i budučym dniom naradžeńnia.
Hod nazad, kali Ivana Surviłu hetaksama vinšavali, svajačka kazała, što jon ničoha nie čuje i nie bačyć. U vieterana ŭžo tady nie było sił samastojna pryŭstać ci pieraviarnucca.
Na videa možna ŭbačyć, jak ciažka vieteranu i jak nienaturalna vyhladajuć plaski vakoł jaho. Heta zaŭvažyli hledačy tyktok-kanała «Zasłaŭje anłajn».
«Mnie zdajecca, heta niešta žudasnaje» — samy papularny kamientar.
«Kryŭdna adno!!! Što bolšaść takich vinšavańniaŭ dla spravazdačy i videa. A nie dla dušy i pamiaci». «Pryjšli raz na hod, pavyli i zmylisia», «Nie treba tak ździekavacca ź dziaduli, jamu takija chvalavańni i niervy nie patrebnyja. I vielmi hučna dla jaho. Dziadulu vinšavańni!» — voś nastupnyja załajkanyja kamientary.
Padčas vajny radavy Ivan Surviła byŭ strałkom 3-ha piachotnaha pałka 1-j piachotnaj dyvizii Vojska Polskaha, braŭ udzieł u Visła-Oderskaj apieracyi. Za słužbu byŭ uznaharodžany miedalami «Za vyzvaleńnie Varšavy», «Za pieramohu nad Hiermanijaj u Vialikaj Ajčynnaj vajnie 1941-1945», «Za ŭziaćcie Bierlina». Atrymaŭ orden Ajčynnaj vajny II stupieni.