«Historyja nas navučyła». Bierlin adkazaŭ na napadki administracyi Trampa z-za pryznańnia AdH ekstremistami
Ministerstva zamiežnych spraŭ Niamieččyny vystupiła ŭ abaronu niadaŭniaj pastanovy ab pryznańni partyi «Alternatyva dla Hiermanii» (AdH) pravaekstremisckaj — u adkaz na rezkuju krytyku hetaj pastanovy, jakaja prahučała z boku pradstaŭnikoŭ administracyi Trampa, piša VVS.
Mitynh ultrapravych u Hiermanii. Fota: Jens Schlueter / Getty Images
Vice-prezident ZŠA Džej Dzi Vens abvinavaciŭ «niamieckich biurakrataŭ «U adnaŭleńni Bierlinskaj ściany, a dziaržsakratar Marka Rubia nazvaŭ rašeńnie Fiederalnaha viedamstva pa achovie kanstytucyi Hiermanii (Bundesamt für Verfassungsschutz, BfV) «zavualavanaj tyranijaj».
Niamiecki MZS adkazaŭ Rubia naŭprost na płatformie Ch, dzie dziaržsakratar jaho i vykazaŭ publična: «Historyja našaj krainy navučyła nas tamu, što spyniać pravy ekstremizm nieabchodna».
«Heta i jość demakratyja», — zajavili ŭ viedamstvie.
Rašeńnie ab pryznańni členaŭ AdH ekstremistami było pryniata BfV na toj padstavie, što
«pieravažnaje ŭsprymańnie [členami partyi] AdH ludziej na padstavie ich etničnaha abo hieahrafičnaha pachodžańnia «supiarečyć ustanoŭlenamu ŭ Hiermanii» svabodnamu demakratyčnamu paradku».
Na fiederalnych vybarach, jakija prajšli ŭ Hiermanii ŭ lutym, AdH zaniała druhoje miesca, atrymaŭšy hałasy bolš za 20% vybarščykaŭ i zabiaśpiečyŭšy sabie ŭ 630-miascovym parłamiencie krainy rekordnyja 152 mandaty.
«[AdH] imkniecca admović niekatorym hrupam nasielnictva ŭ roŭnym udziele ŭ hramadskim žyćci», — tłumačycca ŭ zajavie niamieckich uładaŭ. U pryvatnaści, udakładniajecca, što hramadzian «krain ź pieravažna musulmanskim nasielnictvam» u partyi nie ličać raŭnapraŭnymi členami niamieckaha naroda.
Namieśnik kiraŭnika frakcyi AdH u Bundestahu Bieatryks fon Štorch u efiry VVS paraŭnała hetaje rašeńnie z «tym, jak pastavilisia b da partyi ŭ dyktatury, u aŭtarytarnaj dziaržavie».
Pryznańnie partyi ekstremisckaj daje pravaachoŭnym orhanam prava vieści za AdH schavanaje nazirańnie, pierachoplivać telefonnyja pieramovy afilavanych asob i navat ukaraniać u partyju tajemnych ahientaŭ.
«Heta nie demakratyja — heta tyranija ŭ inšym abliččy», — prakamientavaŭ hetaje rašeńnie dziaržsakratar ZŠA Marka Rubia.
Adkazvajučy kiraŭniku Dziarždepu naŭprost, niamieckija dypłamaty nahadvajuć Rubia, što rašeńnie ŭładaŭ było pryniata na asnovie «starannaha i niezaležnaha rasśledavańnia», a akramia taho — moža być abskardžana ŭ sudzie.
Zhadany ŭ paviedamleńni «ŭrok historyi pra toje, što pravy ekstremizm pavinien być spynieny», — vidavočnaja spasyłka na pieramohu na vybarach 1933 hoda nacyjanał-sacyjalistyčnaj partyi Adolfa Hitlera i palityka paśladoŭnaha paražeńnia ŭ pravach jaŭrejskaha nasielnictva, jakaja ŭ vyniku pryviała da Chałakostu.