«Zastałosia ŭsiaho 6 kvater u horadzie». Na vychodnyja 9 maja razabrali arendnyja kvatery ŭ Hrodnie, Breście i Minsku. Ceny ŭražvajuć
Apošnija try hady ŭ Biełarusi adčuvajecca mocny napłyŭ turystaŭ z Rasii, dla jakich naša kraina stała aknom u Jeŭropu. Šmat unutry krainy padarožničajuć i sami biełarusy. Ceny na pasutačnuju arendu kvater na majskija śviaty bjuć rekordy.
Ilustracyjny zdymak. Fota: «Naša Niva»
Hrodna
Na «Kufary», jaki staŭ dla biełarusaŭ anałaham Booking, u Hrodnie zastajucca volnymi tolki šeść kvater, u jakija možna zasialicca z 9 pa 11 maja. Usie jany — adnapakajovyja. Niekatoryja možna arandavać minimum na dźvie nočy.
Dla paraŭnańnia: na nastupnyja vychodnyja ŭ Hrodnie možna vybirać z 268 kvater.
Fota: skrynšot z sajta kufar.by
Minimum, jaki dva čałavieki mohuć zapłacić za vychadnyja ŭ Hrodnie z 9 pa 11 maja (dźvie nočy), kali buduć braniravać žyllo ciapier, — 450 rubloŭ za dvaich. Stolki prosiać za adnapakajoŭku ahulnaj płoščaj 23 kvadratnyja mietry.
Za pražyvańnie ŭ kvatery-studyi, jakaja znachodzicca ŭ samym centry horada, daviadziecca zapłacić 500 rubloŭ za dvuch darosłych za dźvie nočy abo 540 rubloŭ, kali turysty buduć ź dziciom.
Fota tut i dalej: kufar.by
Z ulikam pavyšanaha popytu navat za kvateru ŭ spalnym rajonie z sastarełym ramontam haspadary chočuć vyručyć 600 rubloŭ za vychodnyja.
Interjery kvatery ŭ Hrodnie, jakuju na hetyja vychodnyja zdajuć pa 300 rubloŭ za sutki.
Padobna da taho, što raźličvajuć na turystaŭ, jakija buduć hatovyja zapłacić lubyja hrošy za miesca dla načlehu, bo ŭsie inšyja ŭžo zaniatyja.
Brest
Naviedać Bresckuju krepaść 9 maja chočuć mnohija, tamu hrodzienskija taryfy na hetyja vychodnyja ŭ paraŭnańni z bresckimi — jašče kvietački.
U Breście ciapier dastupnyja 11 kvater dla zasialeńnia z 9 pa 11 maja.
Samaja tannaja ź ich — adnapakajoŭka sa starym ramontam u spalnym rajonie na ŭskrainie horada. Vychodnyja ŭ joj buduć kaštavać 580 rubloŭ, kali budzie da troch čałaviek.
Interjery kvatery ŭ Breście, jakuju na hetyja vychodnyja zdajuć za 580 rubloŭ.
Aproč hetych apartamientaŭ, dastupnyja taksama varyjanty za 600 i 630 rubloŭ za dźvie nočy.
Za kvatery z sučasnym ramontam, jakija znachodziacca ŭ centry Bresta, prosiać ad 900 da 1100 rubloŭ za dźvie nočy.
Taksama zdajuć dźvie dvuchpakajovyja kvatery. Abiedźvie znachodziacca ŭ centry. Hetyja vychodnyja ŭ ich kaštujuć 1200 i 1550 rubloŭ adpaviedna.
Ź plusaŭ — pry žadańni abiedźvie kvatery možna źniać na adnu noč. Kaštavać heta budzie 700 i 900 rubloŭ adpaviedna.
Na vychodnyja, jakija paśla, u Breście dastupna bolš za 200 kvater.
Minsk
U Minsku na hetyja vychodnyja taksama amal nie zastałosia volnych kvater.
Samaja tannaja prapanova za dźvie nočy — typovy «babušatnik» u chruščoŭcy za 650 rubloŭ. I niešta padkazvaje, što pustoj takaja kvatera zastaniecca nienadoŭha, bo amal usie astatnija zdajuć pa 1000 rubloŭ i daražej.
Minimalnyja ceny na arendu kvatery ŭ Minsku na vychodnyja z 9 pa 11 maja.
Usiaho ŭ Minsku na hetyja vychodnyja volnaj zastałasia 31 kvatera. Dla paraŭnańnia: na nastupnym tydni možna vybirać z 450 apartamientaŭ.
Admietna, što ŭ inšych bujnych haradach Biełarusi deficytu, jak i skačka cen na arendu kvater niama.
U Viciebsku na «Kufary» možna vybirać z 59 kvater. Heta bolš, čym jość volnych kvater na hetyja vychodnyja ŭ Minsku, Hrodnie i Breście razam uziatych.
Ceny na arendu kvater u Viciebsku z 9 pa 11 maja
U Homieli i Mahilovie taksama možna biez prablem adšukać kvateru, zapłaciŭšy pry hetym usiaho 200-400 rubloŭ za dźvie nočy z 9 pa 11 maja.