Tur nie budzie nasić hieorhijeŭskuju stužku, ale pryčyna nie taja, što vy padumali
Prapahandyst Ihar Tur patłumačyŭ, čamu jon pryncypova nie nosić hieorhijeŭskuju stužku. Pryčyna, kali koratka, u tym, što jon nie zasłužyŭ.
Tur kaža, što nie nasiŭ značok z čyrvona-zialonym ściaham na pinžaku, bo jamu aficyjna nie ŭručyli jaho jak znak adroźnieńnia.
«Ja nie dziaržsłužačy, tak što da momantu ŭručeńnia mnie hetaha znaka adroźnieńnia ja nie išoŭ u łarok i sam jaho nie kuplaŭ», — kaža jon.
Taksama Tur nie nosić hieorhijeŭskuju stužku, tamu što jana, raspaviadaje jon, źjaŭlajecca častkaj dziaržaŭnych uznaharod u Rasii — u pryvatnaści, prymacoŭvajecca da ordenaŭ i miedaloŭ, abo vykarystoŭvajecca na hvardziejskich ściahach.
«Ja nie hvardziejec, i ŭžo tym bolš nie ŭdastojeny honaru atrymać dziaržaŭnuju ŭznaharodu, da jakoj hetaja stužka i prykładajecca», — — tłumačyć jon.
Za apošnija dni Alaksandr Łukašenka dvojčy apraŭdvaŭsia za hieorhijeŭskija stužki: pierad Pucinym i navat pierad pucinskim pasłom.
Łukašenka pierakonvaŭ, što ŭ Biełarusi «nichto nie zabaraniaje ni ŭ jakim razie hieorhijeŭskija stužački». Ale pry hetym jon prapanavaŭ Pucinu vyvučyć historyju hieorhijeŭskaj stužački i nazvaŭ jaje «svojeasablivaj».
U Biełarusi zamiest hieorhijeŭskaj stužački daŭno prydumali čyrvona-zialonyja butańjerki ź jabłynievym ćvietam. Ideołahi vyrašyli dystancyjavacca ad hieorhijeŭskaj stužački paśla 2014 hoda, kali jana stała tryvała asacyjavacca z ruskim śvietam i zachopam Danbasa.
Z tych časoŭ prarasijskija aktyvisty sistematyčna krytykujuć čynoŭnikaŭ za niehałosnuju zabaronu na hieorhijeŭskija stužački. Vidać, infarmacyja ciapier dajšła i da Kramla — Łukašenku daviałosia apraŭdvacca.
Masavaja razdača hieorhijeŭskich stužak u Rasii pačałasia ŭ 2005-m. Takim čynam pucinski režym sprabavaŭ stvaryć novy ŭniviersalny simvał, prymalny dla narodaŭ byłoha SSSR, zamiest dyskredytavanaha savieckaha ściaha. Paśla hieorhijeŭskuju stužku vykarystoŭvali padčas zachopu ŭkrainskich ziamiel u 2014 i 2022 hadach.