Juraś Ziankovič raskazaŭ pra svajo vyzvaleńnie i šlach u ZŠA
Niadaŭna vyzvaleny były palitźniavoleny Juraś Ziankovič daŭ intervju vydańniu Deutsche Welle, u jakim davoli padrabiazna raskazaŭ, jakim byŭ praces jahonaha vyzvaleńnia.
Juraś Ziankovič. Skrynšot ź videa
Juraś Ziankovič apisvaje praces svajho vyzvaleńnia tak:
«Ja pačaŭ padazravać, što majo vyzvaleńnie nabližajecca, kali ŭ žniŭni 2024 hoda mianie pieraviali z mahiloŭskaj turmy ŭ SIZA KDB. Tady ž źniali pieršaje videa, na jakim ja vyhladaŭ jak viazień kancłahiera — heta było praz try miesiacy paśla haładoŭki. U KDB mnie paviedamili, što pačaŭsia zvarotny adlik — vyzvaleńnie čakajecca, choć dakładnych terminaŭ nie nazyvali.
Kančatkova ja zrazumieŭ, što rychtujecca vyzvaleńnie, 3 studzienia, kali z mazyrskaj kałonii mianie znoŭ pieravieźli ŭ SIZA KDB — užo nie ŭ aŭtazaku, a ŭ lehkavoj mašynie. Tam adbyłasia sustreča z pradstaŭnikami ŭrada ZŠA, paśla čaho ja amal bieśpierapynna znachodziŭsia ŭ «amierykancy», čakajučy daty.
Ranicaj 29 krasavika mnie paviedamili, što treba źbiracca — spačatku ja padumaŭ, što heta dla zdymak abo niejkaj sustrečy, ale chutka stała zrazumieła, što vyzvaleńnie realnaje. Va ŭsim SIZA admianili prahułki.
Mianie z rukami za śpinaj i apuščanaj hałavoj vyvieli za miežy turmy i praviali ŭ budynak KDB, dzie ŭ kanfierenc-zale adbyłasia sustreča ź Ivanam Ciercielem. Jon paviedamiŭ, što rašeńniem Rady biaśpieki, pa inicyjatyvie Łukašenki, mianie vyzvalajuć.
Na nastupny dzień, 30 krasavika, mianie aficyjna vyvieli z kamiery. Paśla prykładna siami hadzin čakańnia ŭ pamiaškańniach SIZA pryjechali bajcy hrupy «Alfa» i ŭžo biez kajdankoŭ vyvieli mianie za varoty turmy. Navat rečy hetym razam nios nie ja, a supracoŭniki turmy. Mianie pahruzili ŭ lehkavuju mašynu i my vyjechali ź Minska ŭ bok miažy ź Litvoj.
Prykładna za Ašmianami my paviarnuli ŭ les, dzie čakali inšuju mašynu. Pryjechała jašče adna hrupa «Alfy». Usie jany byli ŭ bałakłavach, ščylna šyfravalisia, pastajanna mianiali numary na aŭtamabilach. Paśla hetaha mianie pieraviali ŭ inšuju, jašče bolš darahuju mašynu — «Miersedes».
My čakali, pakul padjedzie kałona dypłamatyčnych aŭto. Kali jaje zaŭvažyli, dałučylisia zzadu. Prykładna praz paŭkiłamietra kałona paviarnuła na druharadnuju darohu ŭ bok niejkaha nievialikaha nasielenaha punkta. Tam mianie ŭžo niepasredna pieradali amierykanskamu boku.
Mianie pasadzili ŭ dypłamatyčny aŭtamabil i paviedamili, što ja pad abaronaj ZŠA, što zaraz my prajedziem praz dypłamatyčny kalidor na miažy. Skazali, što ŭ ambasadzie mianie sustrenuć, asabista vyjdzie spadarynia pasoł. Papiaredzili, što treba budzie skazać niekalki słoŭ, mahčymyja zvanki ad vysokapastaŭlenych asob z Vašynhtona, mahčyma navat ad prezidenta Trampa».