«Bajcy «Azova» praktykujuć achviaraprynašeńni». Praŭda?

Pravieryli słovy dacenta Pravasłaŭnaha Śviata-Cichanaŭskaha humanitarnaha ŭniviersiteta prataijereja Alaksandra Cimafiejeva.

20-hadovy Rej, bajec bryhady «Azoŭ», na pryfrantavoj pazicyi ŭ rajonie Kramiannoj, Danieckaja vobłaść. Fota: AP Photo/Alex Babenko

U svaim telehram-kanale prarasijskaja aktyvistka Volha Bondarava apublikavała razvahi pra duchoŭnaść, vieru i kaštoŭnaści. Tekst atrymaŭsia nastolki abjomny, što jana padzialiła jaho na niekalki častak.

Asabliva Bondaravu chvaluje vieraciarpimaść: pavodle jaje słoŭ, «ad ekumienizmu da satanizmu» — adzin krok. Hetaje śćviardžeńnie jana padmacoŭvaje prykładam z Ukrainy — spasyłajučysia na šyty biełymi nitkami fejk.

«Achviaraprynašeńni ŭ nacysckich bataljonach «Azoŭ» i «Ajdar» stali zvyčajnaj źjavaj. (…) Takija źvierstvy nieanacysty ździajśniali i ŭ Kurskaj vobłaści», — piša Bondarava, spasyłajučysia na słovy dacenta Pravasłaŭnaha Śviata-Cichanaŭskaha humanitarnaha ŭniviersiteta, protaijereja Alaksandra Cimafiejeva.

Zajavu pra «zadakumientavanyja vypadki» Cimafiejeŭ ahučyŭ jašče ŭ listapadzie 2024 hoda. Jaje chutka padchapili rasijskija prapahandysckija ŚMI — adnak nijakich dakumientalnych śviedčańniaŭ ci fotadokazaŭ pradstaŭlena nie było. Heta nie pieraškodziła im raspaŭsiudzić słovy śviataroŭ jak «fakt».

Hetaja historyja — nie pieršaja sproba demanizacyi pałka «Azoŭ» i inšych ukrainskich vajskovych farmavańniaŭ śpiecyjalnaha pryznačeńnia. Heta samyja bajazdolnyja i matyvavanyja čaści ŭkrainskaj armii, tamu jany i stali abjektam asablivaj uvahi rasijskaj, a za joju i łukašenkaŭskaj prapahandy.

Jašče z 2016-ha pa 2021 hod u rasijskich i prarasijskich miedyja pieryjadyčna źjaŭlalisia publikacyi pra «nieapahanstva» ŭ šerahach «Azovu». Ale jany mieli marhinalny charaktar i drukavalisia pieravažna na treciašarahovych sajtach.

Jak adznačaje «Detektar miedyja», da 2022 hoda tema «satanistaŭ u Azovie» ličyłasia marhinalnaj i prysutničała tolki ŭ tak zvanych infarmacyjnych «pamyjkach».

Paśla poŭnamaštabnaha ŭvarvańnia Rasii va Ukrainu ŭ lutym 2022 hoda hety naratyŭ byŭ rezka aktyvizavany. Rasijskija ŚMI stali masava publikavać materyjały pra «azoŭcaŭ-satanistaŭ», «kapiščy», «achviaraprynašeńni». U jakaści «dokazu» pakazvali fota zahadkavych pradmietaŭ, znojdzienych nibyta ŭ pamiaškańniach pałka. Adnak usie hetyja artefakty byli identyčnyja tym, što pradajucca ŭ rasijskich internet-kramach i markietpłejsach.

«Detektar miedyja» pisała, što kolkaść padobnych materyjałaŭ stvarała ŭražańnie «teatralnaj pastanoŭki»: maŭlaŭ, «Śviataja Ruś idzie na vajnu z satanistami».

Da kanca leta 2022 hoda hetaja tema Z-aŭdytoryi pryjełasia, ad naratyvu pra «sataninskich azoŭcaŭ» adčapilisia. Zajava Cimafiejeva ŭ listapadzie 2024-ha stała sprobaj jaho reanimavać, a ciapier estafietu praciahnuła Volha Bondarava.

Kamientary da artykuła