Palihrafołah Vital Saviuk stvaraje novuju partyju. Kožny z kiraŭnikoŭ projdzie detektar chłuśni
Jon razam z paplečnikami źbirajecca zarehistravać u Polščy jurydyčnuju asobu, jakaja stanie biełaruskaj partyjaj «Kraina dla žyćcia».
Vital Saviuk. Fota: Biełsat
Hramadski ruch «Kraina dla žyćcia» choča pierafarmatavacca ŭ palityčnuju partyju. Aktyvisty ŭžo praviali ŭ Varšavie ŭstanoŭčy schod.
Kiraŭnik arhkamiteta pa stvareńni partyi, palihrafołah Vital Saviuk, raskazaŭ «Našaj Nivie» pra svaju inicyjatyvu.
Saviuk pryznajecca, što ni jaho «Kraina dla žyćcia», ni inšyja biełaruskija emihracyjnyja palityčnyja abjadnańni nie mohuć mieć rehistracyju jak palityčnyja partyi. Tamu heta budzie prosta jurydyčnaja asoba, jakaja pačnie prezientavać siabie jak partyja.
«My płanujem rehistravać jurasobu ŭ Polščy, tamu što tut najbolšaja kolkaść aktyvistaŭ, jakija žyvuć za miežami Biełarusi», — tłumačyć jon.
Kolki ž udzielnikaŭ u «Krainie dla žyćcia»? Kankretnaha adkazu niama.
Pa słovach Saviuka, na arhanizacyjnym źjeździe partyi ŭ Varšavie prysutničała kala 50 čałaviek. Pry hetym ahulnaha fota niama, a na apublikavanym zdymku vidać siabroŭ inšych palityčnych ruchaŭ.
Udzielniki źjezda partyi. Fota: telehram-kanał «Narodnaja hramada»
«Mahu skazać z upeŭnienaściu, što ŭ nas prychilnikaŭ nie mienš, čym u luboj inšaj apazicyjnaj partyi. Navat taja kolkaść ludziej, što sabrałasia na źjeździe, kaža pra toje, što cikaŭnaść da našaj dziejnaści jość. Akramia taho, u nas niemałaja kolkaść kantaktaŭ ź ludźmi ŭ Biełarusi. Tak, jany nie zmohuć aficyjna dałučycca da partyi, ale kantaktami ź imi my vielmi daražym, tamu što bieź ludziej znutry Biełarusi my nijakich pieramien nie dasiahniem»», — razvažaje Saviuk.
«Kraina dla žyćcia» ŭdzielničała viasnoj 2024 hoda ŭ vybarach u Kaardynacyjnuju radu i zaniała apošniaje miesca z 61 hołasam u svaju padtrymku — 0,91% ad ahulnaj kolkaści.
U vybarčy śpis «Krainy dla žyćcia» ŭvachodzili 17 čałaviek: Vital Saviuk (lidar), Jeva Sapryhina, Uładzimir Łaŭraniuk, Alaksandr Kavaloŭ, Hanna Ivaškievič, Alaksandr Sałaviej, Natalla Hłazkova, Śviatłana Skakun, Valeryj Pankratovič, Siarhiej Sasunkievič, Siarhiej Žyburtovič, Vasil Skakun, Taćciana Žyburtovič, Anastasija Lejčanka, Arsienij Sałaviej, Iryna Dudko, Kaciaryna Mareckaja.
Letam 2024 hoda aktyvisty ruchu abjadnalisia z udzielnikami «Narodnaj hramady» i adnoj ź Biełaruskich chryścijanskich demakratyj — i vystupili suprać statusu Śviatłany Cichanoŭskaj jak lidarki demakratyčnaj supolnaści.
Dyk navošta Saviuku partyja?
«Kali ja ŭdzielničaŭ u roznych mierapryjemstvach u Jeŭraparłamiencie, to pabačyŭ, što pradstaŭniki palityčnych partyj majuć bolš mahčymaściaŭ dla kaardynacyi dziejańniaŭ. U Jeŭropie isnuje šerah sajuzaŭ palityčnych partyj, dzie možna pasprabavać vyrašać pytańni biełarusaŭ, jakija znachodziacca ŭ emihracyi, i pasprabavać upłyvać z palityčnaha punktu hledžańnia na toje, što adbyvajecca i ŭ Biełarusi. Karaciej, u Jeŭropie deputaty mohuć kudy bolš, čym prosta aktyvisty», — tłumačyć jon matyvacyju, navošta nazyvacca mienavita partyjaj.
Z kankretnych punktaŭ budučaj prahramy, akramia supracoŭnictva z sajuznymi partyjami ŭ inšych krainach i prapanoŭ dla biełaruskich demakratyčnych siłaŭ, Saviuk nazyvaje staŭku na pracu z dobraachvotnikami.
«Kali navat z palitviaźniami jość niejkija prahramy dapamohi, reabilitacyi (chacia taksama šmat niedapracovak), to z dobraachvotnikami, siemjami zahinułych va Ukrainie pytańniaŭ vielmi šmat. Šmat našych rabiat viarnulisia, ź ich užo ŭ partyi niechta, i my nie bačym, kab pra ich niechta, pa vialikim rachunku, dumaŭ, a vajna idzie bolš za try hady ŭžo», — kamientuje jon.
Vital Saviuk — badaj, samy viadomy palihrafołah Biełarusi. U pryvatnaści, jon byŭ adnym ź viadučych adpaviednaj prahramy «Ščyra kažučy» na «Biełsacie». Vidać, heta nakładvaje adbitak na śpiecyfiku budučaj partyi.
Pryniata rašeńnie, što kožny siabar partyi na kirujučaj pasadzie u abaviazkovym paradku projdzie palihraf.
«Niekalki čałaviek z arhkamiteta jaho ŭžo prachodzili. Kali da inšaha člena partyi buduć padazreńni, my taksama prapanujem prajści palihraf. U hramadskim ruchu «Kraina dla žyćcia» ŭžo była takaja praktyka: niekatoryja pahadžalisia na praceduru, inšyja admaŭlalisia, i tady my adchilali ich ad peŭnaj infarmacyi, tamu što prymusić prajści palihraf čałavieka my nie možam», — raskazvaje Saviuk.
Na jaho dumku, Siarhiej Cichanoŭski byŭ by rady, daviedaŭšysia pra ideju stvareńnia partyi. «Jaho hałoŭnaja ideja była ŭ abjadnańni ludziej. Fond patrebny, kab dapamahać ludziam, miedyjahrupa — kab niešta viaščać, a voś hramadski ruch ci partyja — heta ŭžo dla pramoj baraćby».