U Vilni i Varšavie prajšli akcyi da Dnia salidarnaści z palitviaźniami
Sama data adznačajecca 21 maja — u hadavinu śmierci palitviaźnia Vitolda Ašurka, jakoha nie stała za kratami.
Mitynh u Vilni. Fota: Ofis Cichanoŭskaj
U Vilni i Varšavie prajšli akcyi da Dnia salidarnaści z palitźniavolenymi.
U Vilni prajšoŭ mitynh, a pierad im zabieh na 2334 mietry — adsyłka da artykuła 23.34 (pa starym Administracyjnym kodeksie), pa jakim masava sudzili biełarusaŭ za pratesty.
Partret Vitolda Ašurka na akcyi salidarnaści ź biełaruskimi palitviaźniami ŭ Vilni. Fota: «Radyjo Svaboda»
Na mitynhu pračytali apošni list Vitolda Ašurka da maci Aleny Mironaŭny, u jakim jon supakojvaŭ jaje i abiacaŭ chutkuju sustreču, što ŭžo nikoli nie adbyłasia, piša «Radyjo Svaboda».
Sam Vitold pamior 21 traŭnia 2021 hoda ŭ škłoŭskaj turmie, a jahonaja maci — praz try hady ŭ Biarozaŭcy na Hrodzienščynie.
Mitynh u Vilni. Fota: Ofis Cichanoŭskaj
Usiaho kala vilenskaj katedry stajała siem partretaŭ sa źničkami i kvietkami ŭ pamiać pra zahinułych za kratami palitviaźniaŭ.
U inšaj instalacyi siarod dziasiatkaŭ čornych kašul, jakija symbalizavali 1200 ciapierašnich palitviaźniaŭ, było 7 biełych kašul — taksama ŭ pamiać pra pamierłych.
Čornyja i biełyja kašuli na akcyi salidarnaści ź biełaruskimi palitviaźniami ŭ Vilni. Fota: «Radyjo Svaboda»
Śviatłana Cichanoŭskaja na mitynhu źviarnułasia da biełarusaŭ:
«Vitold Ašurak vieryŭ, što pieramieny chutka nastanuć — davajcie i my budziem u heta vieryć i zmahacca dalej. Bo samaje prostaje — heta paddacca adčaju i skłaści ruki. Ale my z vami nie možam sabie dazvolić takoj «raskošy». I čym bolš my budziem aktyŭnyja, tym chutčej jany nastanuć.
Mitynh u Vilni. Fota: Ofis Cichanoŭskaj
Ja chaču źviarnucca da biełarusaŭ u Biełarusi. Darahija, ja viedaju, što vam ciažka, ale ciapier nie čas dla rospačy. Ja viedaju, što vy nie vierycie prapahandzie, nie vierycie režymu i pa-raniejšamu čakajecie pieramienaŭ. I pieramieny abaviazkova pryjduć. My robim dla ich i dla vyzvaleńnia našych palitviaźniaŭ usio mahčymaje».
U Varšavie prajšła akcyja «Šlach da voli praz kajdany». Na joj vystupili palityki Zianon Paźniak, Pavieł Łatuška, žurnalist Alaksiej Dzikavicki, ksionz Viačasłaŭ Barok, eks-palitviazynki Iryna Ščasnaja, Antanina Kanavałava i inšyja, piša «Jeŭraradyjo».
Mitynh u Varšavie. Fota: Alaksiej Dzikavicki