Amal pałova vypusknikoŭ dziaviatych kłasaŭ pastupajuć u kaledžy
Taki vybar časta abumoŭleny tym, što dla pastupleńnia ŭ hetyja navučalnyja ŭstanovy dastatkova dakumientaŭ pra ahulnuju bazavuju abo siaredniuju adukacyju.
Amal 50 % vypusknikoŭ dziaviatych kłasaŭ addajuć pieravahu pastupleńniu ŭ kaledžy. Pra heta raspaviała namieśnik načalnika hałoŭnaha ŭpraŭleńnia prafiesijnaj adukacyi — načalnik upraŭleńnia prafiesijna-techničnaj i siaredniaj śpiecyjalnaj adukacyi Ministerstva adukacyi Alaksandra Piatrova, piša BiełTA.
Pavodle słoŭ A. Piatrovaj, dla pavyšeńnia prestyžu rabočych prafiesij u Biełarusi zroblena mnohaje. Vialikaje značeńnie maje toje, što amal pałova školnikaŭ pastupajuć u kaledžy paśla 9 kłasa. Taki vybar časta abumoŭleny tym, što dla pastupleńnia ŭ hetyja navučalnyja ŭstanovy dastatkova dakumientaŭ pra ahulnuju bazavuju abo siaredniuju adukacyju. Vyklučeńnie składajuć tolki niekatoryja tvorčyja śpiecyjalnaści, dzie nieabchodna acanić navyki i zdolnaści abituryjentaŭ.
Taksama z 2023 hoda kaledžy majuć prava pavialičvać kolkaść miescaŭ pa napramkach, zapatrabavanych ekanomikaj.
— Kali jość dadatkovyja zajaŭki na takuju śpiecyjalnaść, to pryjom ustanova moža pavialičvać da 22 žniŭnia, — udakładniła A. Piatrova.
Śpiecyjalist źviarnuła ŭvahu na toje, što ličby pryjomu ŭ kaledžy štohod rastuć. Pavodle jaje słoŭ, u 2025 hodzie płanujecca pryniać 28 tys. čałaviek na ŭzroŭni prafiesijna-techničnaj adukacyi i amal 39 tys. (30 tys. ź ich — na biudžetnaj asnovie) — siaredniaj śpiecyjalnaj.
A. Piatrova taksama adznačyła stanoŭčuju tendencyju pavieličeńnia kolkaści asob, jakija pastupajuć u kaledžy na ŭmovach metavaj padrychtoŭki.