U Smalavickim rajonie žychary praciahvajuć zmahacca suprać sažałki dla adkidaŭ ź Minska
U Smalavickim rajonie chutkimi tempami budujuć abjekt pad nazvaj «Sažałka-nakaplalnik №19», kudy štodzionna buduć zvozić adkidy z ačyščalnych zbudavańniaŭ Minska. Ale ludzi praciahvajuć zmahacca, patrabujučy nieadkładna prypynić budaŭnictva i pravieści pravierku, piša Ex-press.live.
Fota: Minskaja praŭda
Ludzi ŭžo sabrali bolš za 3000 podpisaŭ i nakiravali zvaroty ŭ Ministerstva abarony i prakuraturu. Akramia taho, žychary zapisvajuć videazvaroty i raspaŭsiudžvajuć ich u sacsietkach.
Pačatak budaŭnictva vyklikaŭ abureńnie ŭ Žodzinie i susiednich vioskach, bo pracy pačalisia biez hramadskaha abmierkavańnia i aficyjnych paviedamleńniaŭ. Heta supiarečyć ekałahičnamu zakanadaŭstvu i pastanovie Minoborony №20. Ludzi ličać, što budaŭnictva viadziecca z parušeńniami, i što abjekt u miežach dziejučaha vajskovaha palihona moža być niebiaśpiečnym dla zdaroŭja, a taksama pahražać zabrudžvańniem hleby i padziemnych vod.
Asnoŭnyja pretenzii žycharoŭ:
-
parušeńnie pryrodaachoŭnych normaŭ i praviłaŭ karystańnia ziamloj;
-
adsutnaść dazvołaŭ i hramadskaha ŭzhadnieńnia;
-
niebiaśpiečnaje raźmiaščeńnie ŭ zonie mahčymych vybuchaŭ.
Žychary patrabujuć:
-
pravieści poŭnuju pravierku zakonnaści i biaśpieki budaŭnictva;
-
prypynić pracy da jaje zaviaršeńnia;
-
pryciahnuć vinavatych da adkaznaści.
Čakajecca vyjaznaja inśpiekcyja, a patrabavańni buduć pieradadzienyja asabista ministru abarony. U sacyjalnych sietkach praciahvajecca aktyŭnaja infarmacyjnaja kampanija: ludzi patrabujuć prazrystaści, zakonnaści i harantyj biaśpieki.
Raniej pradstaŭniki Minpryrody na sustrečy z nasielnictvam zajavili, što prajekt adpaviadaje ekałahičnamu zakanadaŭstvu. Adnak milicyja ŭžo ŭmiašałasia: byŭ vydaleny telehram-čat, dzie abmiarkoŭvali budaŭnictva, i kanfiskavanyja ŭsie błanki z podpisami suprać prajekta.
Varta adznačyć, što padobny abjekt sprabavali budavać u Puchavičach i Maładziečnie, ale dziakujučy pratestam miascovych žycharoŭ płany byli admienienyja.