«Pryčyn zamarožvać budoŭlu niama». Čynoŭniki sustrelisia z pratestoŭcami suprać vadaschovišča dla adkidaŭ pad Žodzina
Sustreča vyjšła vielmi emacyjnaj. Heta zrazumieła navat pa repartažy ŭ dziaržaŭnych ŚMI.
Niepadalok ad Žodzina budujuć sažałku-nazapašvalnik dla adkidaŭ ad staličnaj kanalizacyi. Pra toje, što budaŭnictva ŭ samym razhary, stała viadoma zusim niadaŭna. Heta vyklikała vostruju reakcyju žycharoŭ navakolnych viosak.
Jany niepakojacca, što ad sažałki budzie vielmi mocna pachnuć. Akramia taho, jaje budujuć niedaloka ad vodazaboru, jaki zabiaśpiečvaje pitnoj vadoj Žodzina. Viaskoŭcy arhanizavalisia ŭ čat i pačali źbirać podpisy. Ale na heta vielmi niervova adreahavali siłaviki. Jany zabrali błanki, zabaranili kramam udzielničać u zbory podpisaŭ, a čat pieratvaryŭsia ŭ supołku, u jakoj nielha pakidać kamientary.
Ale rezanans dajšoŭ da čynoŭnikaŭ, i jany ŭsio ž taki vyrašyli sustrecca z pratestoŭcami. Schod adbyŭsia ŭ domie kultury ŭ ahraharadku Budava. Tam sabralisia jak miascovyja žychary, tak i žychary vioski Vostraŭ, dzie budujuć sažałku, i inšych navakolnych viosak.
Na sustreču pryjechali pradstaŭniki Minpryrody, abłasnoha kamiteta pryrodnych resursaŭ i achovy navakolnaha asiarodździa, abłasnoha centra hihijeny, epidemijałohii i hramadskaha zdaroŭja. Miascovyja ŭłady pradstaŭlaŭ staršynia Smalavickaha rajvykankama Mikałaj Paramonaŭ, ź Minska pryjechali kiraŭniki vodakanała i budaŭničaj arhanizacyi.
Z repartažu prapahandystaŭ «Minskaj praŭdy» zrazumieła, što sustreča prajšła vielmi emacyjna. Ludzi aktyŭna zadavali pytańni i aburalisia patencyjna niebiaśpiečnym budaŭnictvam.
Dyrektar «Hardarbuda» Siarhiej Panieŭ raskazaŭ, što sažałka dla adchodaŭ budzie całkam hiermietyčnaj.
«Pa fakcie my budujem hruntovuju, absalutna hiermietyčnuju čašu, pryznačanuju dla zachoŭvańnia hlejnaha asadku. Technična heta karjer, vypracavanaja hruntovaja čaša biez dadavańnia abo vyvazu lišniaha hruntu.
Pa ŭsim pierymietry raźmiaščajecca hieamiembrana taŭščynioj 2 mm: na siońnia heta samy ščylny materyjał, jaki zabiaśpiečvaje hiermietyčnaść. Pa vierchu taksama idzie hieamiembrana, jak dadatkovaja abarona. Terytoryja abjekta 20 ha, ź jakich 13 ha — čaša. Astatniaje — usio toje, što źviazana z absłuhoŭvańniem», — skazaŭ Panieŭ.
Takoje tłumačeńnie miascovych žycharoŭ, miarkujučy pa ŭsim, nie zadavoliła. Aŭtar repartažu piša, što ludzi stali pierakrykvać Panieva i kazać, što takaja sažałka pa susiedstvie im nie patrebnaja.
Dyrektar «Minskvadakanała» Fiodar Rymašeŭski raskazaŭ, što sažałka pa płanach budzie pracavać kala šaści hadoŭ, pakul idzie rekanstrukcyja staličnaj ačyščalnaj sietki. Chutka ŭ Minsku płanujecca pabudavać kompleks pa zbrodžvańni i kompleks pa spalvańni adkidaŭ.
Rymašeŭski dadaŭ, što abjekt budujecca na asnovie suśvietnaj praktyki ŭtylizacyi adkidaŭ, a ŭłady praviali acenku jaho ŭździejańnia na navakolnaje asiarodździe.
Ludzi taksama pacikavilisia ŭ čynoŭnikaŭ, čamu vakoł budaŭnictva vysiakajuć les. Kiraŭnik rajvykankama na heta adkazaŭ, što vysiakańnie nie źviazana z budaŭnictvam: maŭlaŭ, heta płanavyja raboty lashasa.
Pradstaŭnik Minpryrody paabiacaŭ stvaryć kamisiju, jakaja pravieryć, ci adpaviadaje sažałka ŭsim normam. Ale zojmucca hetym tolki paśla zakančeńnia budaŭnictva.
Naprykancy sustrečy kiraŭnik rajvykankama Paramonaŭ prapanavaŭ stvaryć inicyjatyŭnuju hrupu, jakoj čynoŭniki jašče raz rastłumačać, što z sažałkaj budzie ŭsio ŭ paradku. Ale čynoŭniki chutčej stvaryli bačnaść hramadskaha abmierkavańnia. Paramonaŭ padkreśliŭ, što nijakich pryčyn zamarožvać budaŭnictva niama.
Abjekt pad nazvaj «Sažałka-19» raniej chacieli pabudavać u Puchavičach i Maładziečnie. Tam miascovyja žychary ŭ vyniku zmahli prymusić čynoŭnikaŭ admovicca ad budaŭnictva. Ułady Smalavickaha rajona, vidavočna, nastrojenyja bolš rašuča.
Łukašenka: U 2020 hodzie kala Pałaca Niezaležnaści nie pakistancy biehali20
Kamientary
1. Nie prajšło hramadskaje abmierkavańnie spravazdačy ab Acency Ŭpłyvu na Navakolnaje Asiarodździe (AUNA, rus. OVOS).
2. Pracy viaducca biez vydzialeńnia ziamielnaha ŭčastka. Farmalna-faktyčna heta samazachop ziamli.
Ludzi mahli kazać na sustrečy pra toje. Jak i pra pach ad novaha abjekta.
Adnak uładnaja žoŭtaja presa pra toje nie piša. Ich padychod zvyčajny: suprać nieadekvaty, bolšaść źmiryłasia. "Niekotoryje staraliś pieriekričať diriektora priedprijatija, vyskazyvali svoje «kompietientnoje» mnienije: kakim budiet novyj objekt, nužien li on voobŝie. No bolšinstvo vsie-taki priniali usłyšannoje k śviedieniju."
Pierad tym, u noč na 24 krasavika źnik i čat-kanał, u jakim žychary abmiarkoŭvali budaŭnictva. Pierad tym pakazvali, što podpisy dajšli da Kačanavaj i AP, abviaścili žyvuju sustreču z žycharami dvuch susiednich ad sažałki viosak. Taksama (jak i ŭ DoŁHB) byŭ viečar sumniovaŭ, adčyniać čat i ŭ jakim vyhladzie. Pravodzili apytanki, adkazvali na pytańni praz novy čat-bot. I ŭsio.