Novy paŭnočnakarejski eśminiec atrymaŭ praboiny pry spusku na vadu. Kim Čen Yn u hnievie

Padčas spusku na vadu novaha eśminca ŭ Paŭnočnaj Karei adbyłasia surjoznaja avaryja. Incydent adbyŭsia 21 krasavika 2025 hoda ŭ horadzie Čchandžyn na cyrymonii, na jakoj prysutničaŭ sam lidar krainy Kim Čen Yn, piša Euronews.

Fota: AP

Karabiel vodaźmiaščeńniem 5000 ton straciŭ raŭnavahu pry spusku, pierakuliŭsia i atrymaŭ paškodžańni korpusa — u nižniaj častcy vyjavili niekalki praboin. Pra mahčymyja achviary ci dakładny maštab paškodžańniaŭ nie paviedamlajecca.

Kim Čen Yn žorstka raskrytykavaŭ adkaznych čynoŭnikaŭ, navukoŭcaŭ i rabotnikaŭ vierfi, abvinavaciŭšy ich u nieaściarožnaści i nienavukovym padychodzie.

Jon nazvaŭ zdareńnie «niedapuščalnaj surjoznaj avaryjaj» i «złačynstvam», a taksama zapatrabavaŭ adnavić karabiel da červieńskaha plenuma Centralnaha kamiteta partyi, padkreśliŭšy, što heta sprava «aŭtarytetu krainy».

Pavodle ekśpiertaŭ, KNDR vielmi redka pryznaje vajskovyja niaŭdačy, tamu adkrytaje paviedamleńnie pra avaryju moža śviedčyć pra surjoznaść namieraŭ Kima pa madernizacyi vajskova-marskich sił. Adzin z ekśpiertaŭ ź Sieuła adznačyŭ, što Pchieńjan choča pakazać svaju rašučaść i ŭpeŭnienaść u mahčymaści pabudavać mahutny fłot, niahledziačy na časovyja niaŭdačy.

Novy eśminiec «Čo Chion», jaki byŭ aficyjna pradstaŭleny niadaŭna, pavodle dziaržaŭnych ŚMI, zdolny nieści balistyčnyja i kryłatyja rakiety, u tym liku jadziernyja. Paŭdniovakarejskija ŭłady miarkujuć, što karabiel mahli pabudavać z dapamohaj Rasii.

Kamientary da artykuła