Ukraina ŭ miežach abmienu z Rasijaj pieradała jašče adnaho pałonnaha biełarusa. Raniej pra jaho pałon nie paviedamlałasia

Ukraina ŭ miežach abmienu pałonnymi 23 maja pieradała Rasii hramadzianina Biełarusi Alaksieja Čarnyšova. Jak paviedamili «Radyjo Svaboda» va ŭkrainskim prajekcie «Chaču žyć», Alaksieja Uładzimiraviča Čarnyšova zachapili ŭ pałon niadaŭna, ale padrabiaznaściaŭ nie ŭdakładnili.

Rasijskija pałonnyja, pieradadzienyja Ukrainaj u ramkach abmienu 23 maja 2025 hoda. Skryn ź videazapisu Ministerstva abarony Rasii

Da vajny Alaksiej Čarnyšoŭ žyŭ u Navapołacku. Zhodna ź infarmacyjaj ukrainskaha boku, jahonaja žonka Alena žyvie abo zarehistravanaja ŭ Viciebsku.

Imia Čarnyšova było ŭ raniej apublikavanych ukrainskim prajektam śpisach hramadzian Biełarusi, jakija vajujuć na baku Rasii. Viadoma, što jon naradziŭsia 19 lutaha 1969 hoda, ale adsutničajuć źviestki pra toje, kali i ź jakoj vajskovaj čaściu Uzbrojenych sił Rasii Alaksiej Čarnyšoŭ padpisaŭ kantrakt i ŭ jakoj zonie bajavych dziejańniaŭ trapiŭ u pałon.

19 maja biełaruskaha hramadzianina ŭklučyli taksama ŭ bazu ŭkrainskaha centra «Miratvorac», u jakoj z 2014 hoda źbirajuć infarmacyju pra asob, datyčnych da złačynstvaŭ suprać Ukrainy.

«Vajskovy złačyniec, zamiežny najmit-teraryst. Zamach na suvierenitet i terytaryjalnuju cełasnaść Ukrainy. Udzielnik rasijska-biełaruskaj ahresii suprać Ukrainy. Datyčny da hienacydu ŭkrainskaha naroda praź viadzieńnie bajavych dziejańniaŭ suprać mirnaha nasielnictva, hramadzianskich abjektaŭ i infrastruktury. Śviadomaje parušeńnie dziaržaŭnaj miažy Ukrainy», — adznačajecca ŭ kartcy, zaviedzienaj na Alaksieja Čarnyšova centram «Miratvorac».

Zhodna ź infarmacyjaj kiraŭnika vykanaŭčaha dyrektara centra «Miratvorac» Ramana Zajcava (u minułym supracoŭnika terytaryjalnaha ŭpraŭleńnia SBU ŭ Łuhanskaj vobłaści), ciapier u bazie znachodziacca 574 hramadzianiny Biełarusi, jakija vajujuć abo vajavali na baku Rasii. Ź ich, pavodle Zajcava, 170 biełarusaŭ užo zahinuli.

U prajekcie «Chaču žyć» paviedamili, što ŭ pałonie va Ukrainie znachodzicca kala sotni hramadzian z 27 krain, jakija «z nadziejaj čakajuć, što Rasija ich abmianiaje», ale Rasija nie śpiašajecca ich zabirać. U toj ža čas pakul nieviadoma, ci buduć jašče biełarusy siarod pałonnych, jakich płanujuć pieradać 24 i 25 maja.

Za ŭvieś čas abmienaŭ pałonnymi Ukraina pieradała Rasii šeść biełarusaŭ, jakija vajavali na rasijskim baku i byli zachoplenyja ŭ pałon: u 2020 hodzie — Dźmitryja Novikava, u 2024-m — Andreja Hieryłoviča, Maksima Ziaziulčyka i Maksima Zapieku, u 2025-m — Dźmitryja Anančyka i Alaksieja Čarnyšova.

Kamientary da artykuła