Śmiećcievyja kantejniery na pamiežnym pierachodzie pierapoŭnienyja praduktovymi pakietami ad Łukašenki i rasijskimi łahiernymi robami FOTAFAKT
Rasija i Ukraina zaviaršyli najbujniejšy abmien pałonnymi: siońnia viarnulisia pa 303 vajskoŭcy z kožnaha boku. Na pamiežnym pierachodzie ŭ Čarnihaŭskaj vobłaści śmiećcievyja kantejniery byli zabityja łahiernymi robami i pakietami z praduktami ad Łukašenki.
Na pamiežnym pierachodzie «Novyja Jaryłavičy» ŭ Čarnihaŭskaj vobłaści śmiećcievyja kantejniery byli pierapoŭnienyja rasijskimi i biełaruskimi «padarunkami»: łahiernymi robami vajennapałonnych i pakietami z praduktovymi naborami, jakija i raniej razdavalisia biełaruskim bokam padčas abmienaŭ pałonnymi.
Pavodle śviedčańniaŭ vyzvalenych ukrainskich vajskoŭcaŭ, u pakietach ź simvolikaj Biełarusi, jakija jany atrymlivali pierad abmienam, znachodzilisia standartnyja pradukty: hrečka, tušonka, piečyva i vada.
Hetyja pakiety ŭpieršyniu byli zaŭvažany ŭ vieraśni 2024 hoda padčas abmienaŭ na miažy Biełarusi i Ukrainy. Biełaruskija dziaržaŭnyja ŚMI tłumačyli, što heta «suchpajok» dla pałonnych.
Vyzvalenyja ž z pałonu rasijanie razharnuli ŭ Biełarusi impierski ściah.