«Zabojca smartfonaŭ». Hihant štučnaha intelektu abiacaje revalucyju

OpenAI, raspracoŭščyk ChatGPT, abviaściŭ pra novy prajekt, metaj jakoha źjaŭlajecca stvareńnie hadžeta na bazie štučnaha intelektu i zamiena im zvykłych smartfonaŭ. 

Sem Altman (sprava) adznačaje, što Džoni Ajv (źleva) i jaho kamanda dapamohuć «całkam pieraasensavać, što aznačaje karystacca kampjutaram». Fota: OpenAI

Kampanija OpenAI abviaściła ab nabyćci startapa IO, zasnavanaha Džoni Ajvam — lehiendarnym dyzajnieram Apple i suaŭtaram iPhone. Na heta źviartaje ŭvahu vydańnie Rzeczpospolita.pl.

Ajv nazvaŭ prajekt «novym dyzajnierskim rucham», padkreślivajučy jaho pryncypovaje adroźnieńnie ad usiaho, što isnavała raniej. Adnak Sem Altman imkniecca trymać detali ŭ strohaj tajamnicy, kab nie dać kankurentam mahčymaści skraści ideju. Viadoma tolki, što kamanda ŭžo viadzie pieramovy z pastaŭščykami, rychtujučysia da maštabavańnia vytvorčaści.

Stvaralniki padkreślivajuć: heta nie čarhovy smartfon, a pryncypova inšy typ pryłady, asnovaj jakoj stanie štučny intelekt. Džoni Ajv budzie vystupać kansultantam u OpenAI, a hałoŭnaj metaj prajekta zastajecca stvareńnie całkam novaha sposabu ŭzajemadziejańnia ź ličbavymi technałohijami. Kampanija abiacaje, što novaja pryłada budzie vypuščana ŭžo ŭ 2026 hodzie.

Heta ŭžo nie pieršaja sproba «zabić» smartfon. U 2023 hodzie startap Humane, zasnavany byłym inžynieram Apple Imranam Čaudchry, vypuściŭ AI Pin — nievialikuju pryładu biez ekrana, jakuju možna było nasić na vopratcy. Kiravańnie adbyvałasia pry dapamozie hołasu i žestaŭ, a malunak prajektavaŭsia, naprykład, na dałoń. U prajekt inviestavaŭ Sem Altman.

AI Pin rekłamavaŭsia jak zamiena smartfonam, ale nie apraŭdaŭ čakańniaŭ. Pry canie ŭ $700 pryłada sutyknułasia z techničnymi prablemami i niehatyŭnymi vodhukami. Humane spyniła vytvorčaść u chutkim časie paśla pačatku prodažaŭ. Choć prajekt «pamior», jon moža być adrodžany: startap Humane nabyła kampanija Hewlett-Packard — hałoŭnym čynam dziela dostupu da patentaŭ.

Tym nie mienš, OpenAI nie zdajecca. Kupla startapa IO za 6,4 miljarda dołaraŭ śviedčyć pra surjoznaść namieraŭ. U vypadku pośpiechu hadžet moža stać pačatkam novaj ery — biez tradycyjnych ekranaŭ, z bolš naturalnym uzajemadziejańniem pamiž čałaviekam i technałohijaj.

Apple, adzin z hałoŭnych hulcoŭ na rynku mabilnych technałohij, taksama nie zastajecca ŭbaku. Kampanija aktyŭna raspracoŭvaje ŭłasnuju płatformu Apple Intelligence, udaskanalvaje Siri, i, pavodle nieaficyjnaj infarmacyi, razhladaje mahčymaść stvareńnia asobnaj pryłady dla pracy z ŠI — anałahičnaj toj, nad jakoj pracujuć OpenAI i Džoni Ajv.

Niadaŭna adzin z top-mieniedžaraŭ Apple Edzi Kju dapuściŭ, što ŭžo praź dziesiać hadoŭ iPhone moža stać niepatrebny.

Vidavočna, što technałahičnaja industryja znoŭ na miažy pieramienaŭ. Ale što čakaje novy hadžet: tryumf ci pravał? Čas pakaža.

Kamientary da artykuła