HBO pakazaŭ akcioraŭ, jakija syhrajuć Hary Potera i jahonych siabroŭ Rona i Hiermijonu ŭ novym sieryjale
Amierykanski telekanał nazvaŭ imiony maładych akcioraŭ, jakija syhrajuć hałoŭnyja roli ŭ doŭhačakanym sieryjale pavodle knih Džaan Roŭlinh. Novaja ekranizacyja historyi pra chłopčyka, jaki vyžyŭ, stanie adnoj z samych maštabnych televizijnych pastanovak u historyi. Biudžet tolki adnych dekaracyj — miljard funtaŭ.
Arabeła Stentan, Daminik Mak-Łaflin i Ałastar Staŭt, jakija syhrajuć Hiermijonu Hrejndžer, Hary Potera i Rona Uiźli ŭ novym sieryjale ad HBO. Fota: HBO
Jak paviedamlaje Warner Bros. Discovery, hałoŭnaha hieroja — Hary Potera — syhraje Daminik Mak-Łaflin. Rola Rona Uiźli dastałasia Ałastaru Staŭtu, a vobraz Hiermijony Hrejndžer uvasobić Arabeła Stentan.
Usie troje — pačatkoŭcy, dla jakich sieryjał stanie debiutam na vialikim ekranie. Kandydataŭ šukali pa ŭsim śviecie: u adkrytym kastynhu ŭdzielničali bolš za 30 tysiač dziaciej.
«Paśla niezvyčajnych pošukaŭ my rady paviedamić, što znajšli našych Hary, Hiermijonu i Rona. Talent hetych troch unikalnych akcioraŭ uražvaje, i my nie možam dačakacca, kali śviet ubačyć ich sumiesnaje čaraŭnictva na ekranie. My ščyra ŭdziačnyja ŭsim, chto ŭdzielničaŭ u prasłuchoŭvańniach», — paviedamiła šoŭranierka Frančeska Hardynier.
Haradok dla zdymak za miljard
U teleprastory nie tolki akciory vyklikajuć cikavaść, ale i maštaby vytvorčaści. Jak piša Collider, HBO uzvodzić dla sieryjała ŭłasny zdymačny kompleks, jaki kaštuje kala 1 miljarda funtaŭ sterlinhaŭ. Faktyčna, havorka idzie pra ceły nievialiki horad, dzie budzie ŭsio nieabchodnaje dla doŭhaterminovych zdymak: techničnyja pamiaškańni i studyi, miedycynski centr, škoła, kab dzieci-akciory mahli praciahvać navučańnie, valjery dla žyvioł, dekaracyi Cisavaj vulicy, u tym liku znakamity dom siamji Durślaŭ, vykanany ŭ styli Ciudaraŭ.
Pačatak zdymkaŭ
Pavodle apošniaj infarmacyi, zdymki pačnucca letam 2025 hoda, a premjera pieršaha siezona pieraniesienaja na 2027 hod (spačatku mierkavałasia — 2026-y). Usiaho płanujecca siem siezonaŭ — pa adnym na kožnuju z knih Roŭlinh.
Sieryjał budzie dakładnaj adaptacyjaj aryhinalnaj litaraturnaj sieryi, a nie rymiejkam raniejšych filmaŭ. Heta značyć, što hledačy zmohuć ubačyć siužetnyja linii i detali, jakija nie byli pakazanyja ŭ kinaekranizacyi.
Chto syhraje Dambłdara i Snejpa
Da prajekta ŭžo dałučylisia i viadomyja akciory:
-
Džon Lithaŭ (viadomy pa filmie «Kankłaŭ» i sieryjale «Dekster») — Albus Dambłdar,
-
Džanet Mak-Tyr («Pierakaci-pole») — Minierva Mak-Honahał,
-
Paapa Eśjedu («Bandy Łondana») — Sievierus Snejp,
-
Nik Frost («Zombi pa imieni Šon») — Rubieus Chahryd,
-
Luk Tałan («Leapoldštat») — prafiesar Kvireł,
-
Poł Uajtchaus («Hary i Poł») — Arhus Fiłč.
Sieryjał ad HBO, vidać, stanie nie tolki samaj dakładnaj, ale i samaj darahoj ekranizacyjaj «Hary Potera», majučy namier stać televizijnaj padziejaj dziesiacihodździa.