«Streł u śpinu». Rasija abvinavaciła Sierbiju ŭ pastaŭcy bojeprypasaŭ Ukrainie

Rasijskaja Słužba źniešniaj raźviedki abvinavaciła Sierbiju ŭ tym, što jana tajemna pastaŭlaje bojeprypasy va Ukrainu, choć aficyjna zajaŭlaje pra niejtralitet.

Alaksandr Vučyč i Uładzimir Pucin. Fota: Mikhail Svetlov/Getty Images

Pavodle SZR, sierbskija zavody adhruzili sotni tysiač artyleryjskich snaradaŭ i miljony patronaŭ, jakija praz trecija krainy (takija jak Čechija, Polšča, Bałharyja i niekatoryja afrykanskija dziaržavy) trapili ŭ Ukrainu. Dla hetaha nibyta vykarystoŭvali falšyvyja siertyfikaty i schiemy z udziełam bujnych sierbskich abaronnych kampanij.

Rasijskija ŭłady nazvali takija dziejańni «strełam u śpinu» i śćviardžajuć, što hetaja zbroja vykarystoŭvajecca suprać rasijskich vajskoŭcaŭ i mirnaha nasielnictva.

Pavodle danych vydańnia Financial Times, da leta 2024 hoda abjom hetych pastavak skłaŭ kala 800 miljonaŭ jeŭra. Prezident Sierbii Alaksandr Vučyč paćvierdziŭ hety fakt, padkreśliŭšy, što heta spryjaje ekanamičnamu rostu krainy.

Paźniej premjer-ministr Sierbii zajaviŭ, što nie bačyć padstaŭ zabaraniać prodaž bojeprypasaŭ zachodnim krainam, navat kali jany potym akazvajucca va Ukrainie.

Taksama raniej paviedamlałasia, što ŭkrainskija vojski ŭžo vykarystoŭvali sierbskija rakiety ER Grad 2000 dla abstrełaŭ Biełharada. U pačatku 2025 hoda Sierbija skasavała niekalki kantraktaŭ na zakupku rasijskaj zbroi z-za sankcyj. Tym nie mienš, Vučyč usio ž naviedaŭ rasijski parad Pieramohi 9 maja.

Kamientary da artykuła