Łukašenka byŭ u Maskvie biez hieorhijeŭskaj stužki. Najaŭnaść abo adsutnaść stužak padzialiła haściej parada na dźvie hrupy

Alaksandr Łukašenka nie staŭ nadziavać hieorhijeŭskuju stužku, choć takija razdali kiraŭnikam inšych dziaržaŭ, jakija byli haściami parada 9 Maja ŭ Maskvie. U pryvatnaści, z pałasatymi stužkami stajali Uładzimir Pucin i Si Czińpin (na vierchnim fota jany ŭ centry).

Najaŭnaść abo adsutnaść stužak raździaliła haściej parada na dźvie hrupy. Kiraŭniki Tadžykistana, Kyrhyzstana i Ekvataryjalnaj Hviniei stužki mieli.

Pavialičyć

A voś kiraŭniki jeŭrapiejskich dziaržaŭ — Alaksandr Vučyč ź Sierbii, Robiert Fica sa Słavakii (na vierchnim fota jany ŭ druhim šerahu sprava), a ź imi i Alaksandr Łukašenka (u druhim šerahu źleva) — ad takoha žesta ŭstrymalisia. Nie stali nadziavać stužak i prezidenty Kazachstana i Uźbiekistana, jakija pravodziać palityku bałansavańnia miž Rasijaj, Zachadam i Kitajem.

Pavialičyć

Toj ža varyjant vybrali turkmienski dyktatar Sierdar Bierdymuchamiedaŭ i armianski premjer Nikoł Pašynian. Biez stužki byŭ i prezident Vieniesueły Nikałas Madura.

Sam fakt vizitu ŭ Maskvu byŭ prajavaj znachodžańnia na baku Rasii i Kitaja ŭ novaj chałodnaj vajnie, u jakuju pahruziŭsia śviet, abo, prynamsi, bałansavańnia pamiž dvuma vialikimi błokami ci šmatviektarnaści. Z kiraŭnikoŭ krain Jeŭrasajuza ŭ Maskvu pryjechaŭ adzin tolki słavak Fica. Ustrymałasia ad udziełu ŭ paradzie i kiraŭnictva Indyi.

Pavialičyć

Alaksandr Łukašenka, choć i biez pałasataj stužki, vykarystaŭ prysutnaść na paradzie, kab padyhrać kiraŭnictvu Rasii.

Pavialičyć

«Samy lepšy parad, jaki vy pravodzili ŭ Rasijskaj Fiederacyi. U savieckich paradach ja ŭdziełu nie braŭ — zialony byŭ. A ŭsie rasijskija parady ja bačyŭ. I mahu skazać, što heta samy mocny parad», — skazaŭ jon.

«Niekatoryja achali, ochali, što, moža, techniki nie chapała, asabliva pavietranaha ešałona. Vy ž razumiejecie — čas vajenny. Tamu nie da taho, kab brać z frontu techniku i tut pakazvać. Pakazali novyja ŭzory. Małajcy. My heta viedajem. My zakupili takuju techniku ŭ Rasijskaj Fiederacyi. Tamu mianie całkam zadavoliła toje, što ja bačyŭ», — adznačyŭ Alaksandr Łukašenka.

«Ciapier pasprabujem heta praciahnuć u Minsku. U 20:30 u nas svoj biełaruski parad. My śpiecyjalna jaho na viečar pieranieśli. Bo treba było pabyvać u Maskvie», — dadaŭ Łukašenka.

Alaksandr Łukašenka taksama zajaviŭ, što Rasija hatovaja zaklučyć mir. Heta byŭ adkaz na pytańnie, ci pahodzicca zaraz prezident Rasii Uładzimir Pucin na pieramirje.

«Prezident Pucin uvohule nikomu ničoha nie pavinien. Kab vy razumieli. Heta pieršaje. Što tyčycca pieramirja, ja mahu skazać jaho słovami. My ź im pra heta havaryli apošni raz u Vałhahradzie. Jany hatovyja da hetaha. Rasija daŭno hatovaja nie prosta da pieramirja, a kab mir zaklučyć», — skazaŭ Łukašenka.

Pavialičyć

Łukašenku na paradzie ŭ Maskvie pasadzili pobač z armianskim premjeram Nikołam Pašynianam. U ich daŭni kanflikt, jany nieadnarazova abmieńvalisia kołkaściami i navat svarylisia na adnym z samitaŭ. Ale parad daviałosia hladzieć razam. Pašynianu takoje susiedstva vidavočna nie padabałasia. Na ŭskładańni kvietak jon sprabavaŭ trymać dystancyju.

Z druhoha boku ad Łukašenki ŭpieršyniu pasadzili jaho syna Kolu.

Hieorhijeŭskija stužki — praktyčna apošniaje, što ciapier adroźnivaje publičnuju prastoru Biełarusi ad rasijskaj. Za apošnija dva tydni Alaksandr Łukašenka dvojčy apraŭdvaŭsia z hetaj nahody.

Pavialičyć

Alaksandr Łukašenka, 29 krasavika 2025 hoda. Photo by Contributor Getty Images

«Takaja ŭvaha źviazanaja sa sprobaj u peŭnych kołach štučna raskrucić hetaje pytańnie i zrabić punktam zvady ŭ biełaruska-rasijskich adnosinach. Bačačy hetuju tendencyju, Alaksandr Łukašenka prama i adkryta adreahavaŭ, kab spynić mahčymyja insinuacyi», — paviedamlała biełaruskaje dziaržaŭnaje ahienctva BiełTA.

«Nu my vam adkazali z Uładzimiram Uładzimiravičam nakont stužak. Što mianie zdziviła, jon kaža: «Słuchaj, raskažy mnie, u čym štuka». Ja kažu: «Ja dumaŭ, heta ad ciabie ŭsio idzie». — Nie, ja ŭpieršyniu čuju. — Nu kažu, tady, napeŭna, ad našaha supolnaha siabra. — Ad kaho? — Ja kažu: «Nu jak, ad Barysa Viačasłavaviča (pasła Rasii Barysa Hryzłova. — NN)». Zaśmiajaŭsia (Pucin. — NN), kaža: «Nie, nie moža być». Jon kaža: «Adkul?». Ja kažu: «Ty pahladzi, moža, ad «Rassupracoŭnictva» (rasijskaje ahienctva, jakoje padtrymlivaje struktury ŭpłyvu ŭ śviecie, i adnačasova špijonskaje hniazdo — NN). Ja nie śćviardžaju», — raskazvaŭ Alaksandr Łukašenka padrabiaznaści razmovy z Uładzimiram Pucinym.

«Chočacie sa stužkami, ja i jamu skazaŭ — kali łaska, chočacie z našymi stužkami (jabłynievym ćvietam — NN) — kali łaska. Chto jak choča. My ž svaje ludzi. My ž nie nosim svastyki, jak va Ukrainie (fejk i raspalvańnie varožaści — va Ukrainie taksama nie nosiać svastyk — NN). Vy prapanavali nam. U hetym płanie my vyznačylisia. Dumaju, svajo pavinna być jakoje-niebudź adroźnieńnie», — skazaŭ Alaksandr Łukašenka.

Pieršy raz z-za hieorhijeŭskich stužak Alaksandr Łukašenka raptam pačaŭ apraŭdvacca na sustrečy z Uładzimiram Pucinym u Vałhahradzie.

«Nichto nie zabaraniaje ni ŭ jakim razie hieorhijeŭskija stužački», — pasprabavaŭ pierakanać surazmoŭcu Łukašenka.

Pry hetym jon prapanavaŭ Pucinu vyvučyć historyju hieorhijeŭskaj stužački i nazvaŭ jaje svojeasablivaj. Ale dadaŭ, što nie maje ničoha suprać.

«U nas ideja absalutna adnolkavaja. Adna Ajčyna ad Bresta da Uładzivastoka», — paŭtaryŭ svoj zajezdžany tezis Łukašenka.

Na samaj spravie ŭ Biełarusi zamiest hieorhijeŭskaj stužački ŭžo daŭno prydumali čyrvona-zialonyja butańjerki ź jabłynievym ćvietam. Ideołahi vyrašyli dystancyjavacca ad hieorhijeŭskaj stužački paśla 2014 hoda, kali jana stała tryvała asacyjavacca z ruskim śvietam i zachopam Danbasa.

Z tych časoŭ prarasijskija aktyvisty sistematyčna krytykujuć čynoŭnikaŭ za niehałosnuju zabaronu na hieorhijeŭskija stužački. 

Masavaja razdača hieorhijeŭskich stužak u Rasii pačałasia ŭ 2005-m. Takim čynam pucinski režym sprabavaŭ stvaryć novy ŭniviersalny simvał, prymalny dla narodaŭ byłoha SSSR, zamiest dyskredytavanaha savieckaha ściaha. Paśla hieorhijeŭskuju stužku vykarystoŭvali padčas zachopu ŭkrainskich ziamiel u 2014 i 2022 hadach.

U rehijonach Biełarusi masava razdajuć hieorhijeŭskija stužki «Ruskija damy».

Pavialičyć

Hieorhijeŭskija stužki masava pranikali ŭ Biełaruś da 2014 hoda. Archiŭnaje fota Andreja Stryžaka

U Vałhahradzie ŭvahu žurnalistaŭ źviarnuŭ taksama epizod razdačy kałaradskich stužak biełaruskim top-čynoŭnikam. Ihar Marzaluk zastaŭsia ź jabłynievaj.

Pavialičyć

Fota pres-słužby Pałaty pradstaŭnikoŭ

• 1
• 1
• 9
• 3
• 1
• 0
• 0
• 0