Chedłajnieram kancerta paśla viełakarnavała «Viva, Rovar» budzie Stas Pjecha

31 maja ŭ stalicy adbudziecca mižnarodny viełafiestyval «Viva, Rovar». Udzielniki ŭ kreatyŭnych kaściumach źbiarucca kala Pałaca sportu i prajeducca viełakałonaj da «Minsk-Areny» i nazad — usiaho kala 10 kiłamietraŭ. Pačatak mierapryjemstva pryznačany na 15:00.

Stas Pjecha na scenie. Fota ilustracyjnaje

Fiestyval pravodzicca z 2015 hoda, a najbolšy razmach jon atrymaŭ u 2019-m, kali sabraŭ 30 tysiač čałaviek. Ale paśla pandemija i inšyja padziei vymusili arhanizataraŭ uziać paŭzu, i tolki ciapier «Viva, Rovar» viartajecca ŭ poŭnym farmacie.

Pavodle arhanizataraŭ, na ŭdzieł u mierapryjemstvie zarehistravalisia bolš za 3 tysiačy ŭdzielnikaŭ.

Mierapryjemstva abjadnoŭvaje darosłych i dziaciej. Pierad asnoŭnym zajezdam startujuć dziciačyja spabornictvy «Pieršy rovar», u jakich prymie ŭdzieł bolš za 800 dziaciej. Fest taksama ŭklučaje roznyja konkursy: «ViełaŁedzi», «ViełaKids», «ViełaSiamja», «ViełaKamanda» i navat «Samy smačny kaścium».

Paśla viełaprabiehu kala Pałaca sportu adbudziecca śviatočnaja prahrama z vystupami viadomych rasijskich artystaŭ: Stasa Pjechi, Dzianisa Klaviera, Rusłana Alachno i inšych.

Hałoŭny chedłajnier — rasijski śpiavak Stas Pjecha, kancert jakoha zavieršyć mierapryjemstva. Jon płanuje i sam udzielničać i ŭ zajeździe.

Stas Pjecha nieadnarazova byŭ zaŭvažany ŭ padtrymcy dziejańniaŭ Rasii suprać Ukrainy. Jon vystupaje z kancertami ŭ akupavanych Daniecku i Łuhansku, sustrakajecca z udzielnikami vajennych dziejańniaŭ. U jaho repiertuary jość pieśni, jakija adkryta apraŭdvajuć dziejańni Rasii. U 2023 hodzie byŭ uklučany ŭ sankcyjny śpis Ukrainy za padtrymku rasijskaj ahresii.

Kamientary da artykuła