Praciŭniki Cichanoŭskaj źbirajucca na kruhły stoł, kab vyrašyć, jak žyć dalej
Byłyja palitviaźni Siarhiej Piatruchin i Siarhiej Koršun, błohier-pravakatar Vital «Virus» Kandracienka i aktyvist dyjaspary Michaił Kučaraŭ, niekali blizki da Volhi Karač i siamji Capkałaŭ, rekłamujuć kruhły stoł pad nazvaj «Schod nieabyjakavych». Mierapryjemstva maje adbycca 21 červienia ŭ Varšavie i «znajści stratehičnaje rašeńnie dla raźviazvańnia biełaruskaha palityčnaha kryzisu».
Śviatłana Cichanoŭskaja
Na hety momant dakładna nieviadoma pra skład arhkamiteta padziei. Nazyvaje siabie tolki Michaił Kučaraŭ — były milicyjanier, jaki jašče ŭ 1990-ja zvolniŭsia z orhanaŭ, a ciapier žyvie ŭ Luksiemburhu.
«Naša Niva» źviarnułasia da Kučarava pa kamientar, kab vyśvietlić detali kruhłaha stała: chto jaho jašče arhanizoŭvaje, za jakija srodki, jakija kankretna pradstaŭniki apazicyi i hramadskija dziejačy prymuć tam udzieł, jakuju pradmietnuju metu staviać pierad saboj arhanizatary. Ale lidar luksiemburhskich biełarusaŭ u vyniku pieradumaŭ adkazvać na pytańni.
Michaił Kučaraŭ. Fota: fejsbuk
«Pakul iduć uzhadnieńni, usia publičnaja infarmacyja — data praviadzieńnia i rehistracyja. Bolš ničoha. Usio, što možna ahučvać — užo ŭ publičnym poli», — zajaviŭ jon.
U formie rehistracyi na kruhły stoł, jak i ŭ samim zaprašeńni akcentujecca ŭvaha na temie «kryzis davieru, pytańnie lidarstva». Chutčej za ŭsio, siarod inšaha tam budzie abmiarkoŭvacca pytańnie davieru da Śviatłany Cichanoŭskaj i Paŭła Łatuški — tema, jakaja nie daje spakoju apanientam Ofisa i NAU. A ŭsie asoby, jakija ŭžo prapijaryli padzieju, słaviacca krytykaj na adras hetych demakratyčnych siłaŭ.
Tak vyhladaje infarmacyja pra mierapryjemstva, jakuju prarekłamavaŭ u svaim kanale błohier-kanśpirołah Vital «Virus» Kandracienka