Čynoŭnik zajaviŭ, što moładź choča pracavać narmalna — «jak ruskija»
«Ja z uźbiekistancami pracavaŭ. Jany kazali, što ruskija nikoli tak nie buduć pracavać, jak my».
Skryn videa: CTVBYvideo / YouTube
U prahramie «Da! No…» na STB abmiarkoŭvali temu pracoŭnych mihrantaŭ. Načalnik adździeła Centra pa zabieśpiačeńni dziejnaści biudžetnych arhanizacyj Minskaha rajona Alaksandr Hustyr zadaŭ pytańnie najmalnikam:
«Ci sapraŭdy prablema pryciahnieńnia imihrantaŭ u tym, što jość deficyt kadraŭ, a nie, dapuścim, zapyty našych hramadzian u płanie ŭmoŭ pracy, zarabotnaj płaty, i hetak dalej?»
Namieśnik hienieralnaha dyrektara Aršanskaha lnokambinata pa ideałahičnaj rabocie i sacyjalnych pytańniach Siarhiej Sidzin adkazaŭ jamu, što vyniki ankietavańnia, jakija jany pravodziać siarod vypusknikoŭ škoł, pakazvajuć, što moładź «choča być błohierami, tyktokierami, kim zaŭhodna, ale tolki nie rabočymi».
Skryn videa: CTVBYvideo / YouTube
Pa jaho słovach, paśla madernizacyi na šviejnuju fabryku patrabujecca 250 švačak, ale «zaraz u horadzie na švačak prychodzić 25 čałaviek u hod». U vyniku davodzicca pracavać u adnu źmienu.
Sidzin paraŭnaŭ staŭleńnie da pracy roznych pakaleńniaŭ.
«Ludzi (…) bolš za 50 hadoŭ. Voś ja prychodžu da ich i kažu, chłopcy, tut z płanam troški nie tak, treba padnacisnuć. Jany kažuć: «Uładzimir Iljič, vyjdziem, što treba?» Padychodžu da maładoha čałavieka: «Nu, davaj vaźmi paŭtary, vaźmi jašče adzin bok u pradzilnaj mašynie. Nu, treba». «A navošta mnie? Mnie voś 2,5 tysiačy, mnie chopić».
Hustyr zaŭvažyŭ, što «kožny hramadzianin svajoj krainy choča ŭ svajoj krainie pracavać u ramkach narmalnaha hrafika». I zhadaŭ dośvied pracy ŭ Rasii:
«Voś vy havorycie pra toje, što treba šmat vyrablać. Ja, dapuścim, za miažoj pracavaŭ, u Rasii. Jak ruskija na heta hladzieli? Ja z uźbiekistancami pracavaŭ. Ja na linii pracavaŭ miechanikam. U maim padparadkavańni było čatyry žychary z Uźbiekistana. Jany kazali, što ruskija nikoli tak nie buduć pracavać, jak my.
Ale ruskija, u svaju čarhu, zajaŭlali pra toje, što my chočam u svajoj krainie pracavać narmalna, z vaśmi da piaci, kab u nas byli vychodnyja, paŭnavartasny režym adpačynku i snu, i paŭnavartasnaje sacyjalnaje žyćcio. Ja pra heta kažu».
Na heta Siarhiej Sidzin zaŭvažyŭ, što najmalniki nie chočuć pryciahvać u Biełaruś raboŭ.
«Pytańnie staić nie ŭ tym, što pryjezdžyja ludzi vycieśniać našych u rabotach, i my budziem paharšać ich stan. Nie, my zrobim mahčymaść takuju, kab hetyja ludzi, jakija pryjeduć, zaniali našy vakansii. Na mnohich pradpryjemstvach hetyja vakansii vielmi vialikija i doŭha nie zapaŭniajucca».