«Zakazaŭ bolš, čym mašyn na linii». Kiraŭnik «A1 taksi» — pra ceny i biełaruskuju movu ŭ dadatku

U pačatku maja telekamunikacyjnaja kampanija «A1» zapuściła ŭ Biełarusi svoj servis taksi. Jany zrabili staŭku na fiksavanyja ceny na pajezdki, jakija nie buduć zaležać ad nadvorja ci jašče jakich-niebudź faktaraŭ. Pakul novaje taksi dastupna tolki ŭ Minsku. Kiraŭnik «A1 taksi» Jaŭhien Laŭdanski raskazaŭ Office Life, jak majecca servis.

«A1» vyrašyła vyjści na rynak taksi z vosieni 2024 hoda. Dla hetaha kampanija nabyła adnaho ź viadomych hulcoŭ — słužbu taksi «Bavaryja». U sakaviku 2025 hoda stała viadoma ab zapusku servisu z 1 maja. Na starcie ŭ «A1 taksi» było bolš za 3 tysiačy mašyn.

«Zaraz zakazaŭ bolš, čym mašyn na linii», — kaža Jaŭhien Laŭdanski.

«Što tyčycca techničnych pytańniaŭ, to my słuchajem dva baki. Naprykład, kiroŭcy paskardzilisia, što knopka «Tryvoha» ŭ dadatku zanadta jarkaja i vialikaja, i jany časta vypadkova jaje kranali. Pasažyry prasili dadać biełaruskuju movu ŭ dadatak. My na starcie nie paśpieli heta zrabić, paskorylisia — i ciapier jana jość u novym relizie».

Laŭdanski pryznaje, što «Jandeks taksi» — mocny kankurent.

«Ale my bačym, što ŭ čymści jon sprabuje iści za nami, i heta mianiaje rynak. Naprykład, my nie ŭvodzili asobnyja taryfy dla pasažyraŭ ź dziećmi abo žyviołami. Ciapier bačym, što ŭ inšych słužbaŭ u raździele «Taryfy» nasuprać hrafy «dziciačaje kresła» napisana «nie bolš za 0 rubloŭ». Praŭda, kali pry zamovie vybiraješ taryf «Dziciačy» i toje, jakoje aŭtakresła treba, cana pavialičvajecca. Upeŭnieny, klijent raźbiarecca».

«A1 taksi» zrabiła staŭku na fiksavanyja taryfy. Pa nazirańniach pasažyraŭ, heta daražej, čym u inšych taksi. Laŭdanski zaŭvažaje:

«Jak možna paraŭnoŭvać, kali jechali ŭ adzin bok — była adna cana, a viartajeciesia tut ža nazad — užo ŭ dva razy daražej? Abo jechali za 10 rubloŭ, doždž pajšoŭ — užo 40… My za jakaść, stabilnaść i prazrystaść. My zadavolenyja, što paśla našaj zajavy ab vychadzie na rynak ceny ŭ kankurentaŭ tut ža źnizilisia. Dla spažyŭca heta dobra.

Našy taryfy fiksavanyja, jany ekanamična abhruntavanyja. Upeŭnieny, što hetyja areli «ŭvierch-uniz» z cenami chutka skončacca. Rynak ad hetaha ŭžo stamiŭsia. Taryfy, jakija nižejšyja za ekanamična abhruntavanyja vydatki, prosta «vypalvajuć» usich pieravozčykaŭ. Heta nie pra raźvićcio biznesu. Bo pieravozčyku nieabchodna abnaŭlać aŭtapark, a dla hetaha patrebna rentabielnaść».

Pakul «A1 taksi» pracuje tolki ŭ Minsku, ale płanuje pašyracca i na rehijony.

Kamientary da artykuła