Z 1 maja na rynku taksi źjaviŭsia novy hulec — svoj servis zapuściła kampanija A1. Pakul novaje taksi dastupna tolki ŭ stalicy. Office Life u dzień zapusku paraŭnaŭ, pa jakich taryfach možna zamović mašynu ŭ troch słužbach taksi ŭ Minsku.
Što i jak paraŭnoŭvali? Dla ekśpierymientu vybrali try słužby: «Jandeks Taksi», jakomu ciapier naležyć 90% rynku, novaje taksi ad A1 i adnu z najstarejšych słužbaŭ — «Taksi 135». Ranicaj 1 maja žurnalisty zrabili zapyt u dadatkach hetych słužbaŭ pa roznych maršrutach — pa Minsku na nievialikuju adlehłaść, u inšy kaniec horada i ŭ aeraport. Važny momant: paraŭnoŭvali dynamičnyja taryfy i va ŭsich troch słužbach vybrali samy tanny taryfny płan.
Pa horadzie
Dla pačatku pahladzieli na pajezdku na nievialikuju adlehłaść. Z rajona parku im. Čaluskincaŭ treba było dabracca na Surhanava.
Maršrut praciahłaściu prykładna 3 km prapanujuć pieraadoleć za 6-10 chvilin. Kali vybirać taryfny płan «Ekanom», to «Jandeks Taksi» i «Taksi 135» prapanujuć canu kala 5,2 rubla, u «A1 taksi» — amal 6,6 rubla.
Kali abrać bolš praciahły maršrut (amal 15 km) u samy kaniec praśpiekta Dziaržynskaha, to «Jandeks taksi» prapanuje košt 14,6 rubla, «Taksi 135» — 16,35 rubla, a «A1 taksi» — 17,52 rubla.
Źviarnuli ŭvahu, što ŭ abodvuch varyjantach čas pajezdki ŭ «A1 taksi» budzie samym praciahłym. Adrazu prykinuć, praz kolki moža pryjechać mašyna, možna tolki ŭ dadatku «Jandeks Taksi», u astatnich słužbach dla hetaha treba pierajści da radziełu «Zamović».
A što z aeraportam?
Taksama žurnalisty pahladzieli, kolki budzie kaštavać u hety ž čas pajezdka ŭ troch roznych słužbach u aeraport. Adlehłaść — kala 40 km. Samy darahi varyjant hetaj ranicaj prapanavała słužba «Taksi 135» — 80 rubloŭ.
U «A1 taksi» ceńnik skłaŭ 67,79 rubla (čas u darozie dadatak raźličvaje jak 1 hadzinu 10 chvilin — u dva razy daŭžej za astatnija). «Jandeks Taksi» zhodny vieźci za 53 rubli.
Što ŭ vyniku?
Novaje taksi pakul chutčej prajhraje hałoŭnamu kankurentu pa cenavym faktary. Adnak treba razumieć, što ekśpierymient zrobleny va ŭmovach nizkaha popytu (vychadny dzień i rańniaja ranica) i pry adnosna dobrym nadvorji (biez daždžu abo śniehapadu). Tamu pakul składana acanić vyhadnaść opcyi novaha taksi ad A1 ź fiksavanymi taryfami, jakija, jak abiacajuć, nie buduć zaležać ad źniešnich faktaraŭ. Pakul va ŭsich troch varyjantach jany na 1,5-5 rubloŭ vyšejšyja za dynamičnyja ŭ zaležnaści ad maršrutu, adnak dakładny raźlik usio roŭna zaležyć ad kaeficyjentaŭ u taryfnych płanach.
Taksama realnyja vydatki pasažyra pry zamovie mohuć akazacca mienšymi za zajaŭlenyja sumy dziakujučy bonusnym prahramam. Miarkujučy pa ŭsim, hulcy buduć aktyŭna karystacca imi dla ŭtrymańnia i (abo) pryciahnieńnia klijentaŭ.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach12
Kamientary