U minskaj kramie pradajuć «narviežski» syr ad biełaruskaha vytvorcy pa 160 rubloŭ za kiłahram
Na pryłaŭkach hipiermarkieta «Hryn» źjaviŭsia syr brunust ad biełaruskaha zavoda z kaśmičnaj canoj — ažno 160 rubloŭ za kiłahram. Jaho ž vyrablajuć i fiermiery — ale značna taniej.
Skrynšot: green-dostavka.by
Brunast — heta tradycyjny narviežski syr, jaki vyrablajuć z małaka, viarškoŭ i małočnaj syrovatki. Ich kipiaciać razam na praciahu niekalkich hadzin, pakul usia vada nie vyparycca. Pry hetym cukar pieratvarajecca ŭ karamiel, što i nadaje syru jaho asablivy koler i smak.
Brunast, jaki pradajecca ŭ «Hrynie», pryjechaŭ nie z Narviehii. Elitny syr pastaŭlaje biełaruski vytvorca — «Babuškina krynka». Rasfasavany jon pa 500 hram. Kiłahram kaštuje amal 160 rubloŭ. Pradajecca hety skarb u draŭlanaj skryni.
Biełaruskija fiermiery taksama vyrablajuć kraftavy syr. Ceny ŭ ich kusajucca, ale ŭsio ž mienšyja. Błohierka, jakaja viadzie instahram fiermierskaha rynku ŭ Minsku «Usio svajo», raspytała ŭ pradaŭcoŭ, za kolki jany pradajuć brunast.
— Naš pa 95 rubloŭ za kiłahram, — adkazała pieršaja žančyna. — Možna kupić roznyja kavałki, navat 50 hram. Jaho nie treba šmat nabyvać, bo jaho jaduć maleńkimi kavałačkami, smakujučy ź finikami, kavaj. Heta sublimavany kalcyj, vielmi karysna dla kostak, zuboŭ i skury.
Inšy fiermier pradaje brunast pa 100 rubloŭ za kiłahram. Błohierka, jakaja dehustuje kraftavyja syry, śćviardžaje: u kožnaha fiermiera svoj smak brunasta.
Jašče adzin fiermier prapanoŭvaje brunast z kazinaha małaka. Ale kali błohierka dajšła da jaho, to mužčyna ŭžo paśpieŭ pradać hety narviežski prysmak. Košt byŭ 55 rubloŭ za kiłahram, ci 5 rubloŭ za 100 hram.
Čytajcie taksama:
U Minsku pradajuć nievialiki šaryk marožanaha za 60 rubloŭ. Što nie tak z hetym desiertam?