Rute: NATA treba pavialičyć vydatki na SPA ŭ piać razoŭ

Hienieralny sakratar NATA Mark Rute, vystupajučy ŭ Łondanie zajaviŭ, što krainam-udzielnicam aljansu treba značna pavialičyć svaje vydatki na supraćpavietranuju i supraćrakietnuju abaronu — u piać razoŭ, abo na 400%. Heta, pavodle jaho słoŭ, nieabchodna, kab abaranić siabie ad pavietranych udaraŭ z boku Rasii, padobnych da tych, što jana nanosić va Ukrainie.

Mark Rute. Fota: AP Photo / Geert Vanden Wijngaert

Rute padkreśliŭ, što navat kali vajna va Ukrainie skončycca, pahroza z boku Rasii nie źniknie. Tamu NATA treba zrabić «kvantavy skačok» u raźvićci svajoj abaronnaj zdolnaści. Jon zaklikaŭ aljans stać «macniejšym, spraviadliviejšym i našmat bolš efiektyŭnym».

U svajoj pramovie ŭ Łondanie Rute taksama skazaŭ, što Rasija vyrablaje ŭ čatyry razy bolš snaradaŭ, čym uvieś NATA, chacia jaje ekanomika ŭ 25 razoŭ mienšaja za sumarny VUP krain aljansu. Heta, pavodle jaho, stała mahčymym dziakujučy padtrymcy z boku Kitaja, Paŭnočnaj Karei i Irana.

Da samitu NATA, jaki projdzie naprykancy červienia ŭ Haazie, čakajecca damoŭlenaść ab tym, što krainy buduć vydzialać da 5% svajho VUP na abaronu. Ź ich 3,5% pojduć na techniku i armiju, jašče 1,5% — na infrastrukturu i vajskovuju pramysłovaść.

Pradstaŭnik Kramla Dźmitryj Piaskoŭ užo adreahavaŭ na hetyja zajavy, nazvaŭšy rasijskuju pahrozu «efiemiernaj» i abvinavaciŭšy NATA ŭ biessensoŭnym marnavańni hrošaj jeŭrapiejskich padatkapłatnikaŭ.

Rute taksama vykazaŭ padtrymku sprobam prezidenta ZŠA Donalda Trampa damahčysia pieramirja va Ukrainie i pachvaliŭ jaho za adnaŭleńnie dyjałohu z Rasijaj. Jon zajaviŭ, što vajna moža skončycca tolki tady, kali Pucin sam vierniecca za stoł pieramoŭ i padkreśliŭ, što pradstaŭnik Kramla Uładzimir Miadzinski dla hetaj roli nieprydatny.

Kamientary da artykuła