Duda: Rasija vydychajecca, a my macniejem. A nakont Ukrainy ŭ NATA ja z Naŭrockim pahavaru
Prezident Polščy Andžej Duda ŭ intervju litoŭskamu telebačańniu supakoiŭ nakont staŭleńnia novaabranaha prezidenta Karala Naŭrockaha da Ukrainy. Jon taksama raskazaŭ, što dumaje rabić paśla prezidenctva.
2 červienia prezident Polščy Andžej Duda ŭziaŭ udzieł u sustrečy «Bucharesckaj dziaviatki» — samita dziaržaŭ uschodniaha fłanha NATA. Sustreča adbyłasia ŭ Vilni, i ŭ joj udzielničali taksama prezident Ukrainy Uładzimir Zialenski i hienieralny sakratar NATA Mark Rute.
Duda byŭ u vydatnym nastroi: napiaredadni, 1 červienia, na prezidenckich vybarach u Polščy pieramoh jahony palityčny sajuźnik Karal Naŭrocki.
U intervju litoŭskamu hramadskamu telebačańniu LRT Duda supakojvaŭ nakont zamiežnapalityčnych ustanovak Naŭrockaha.
Naŭrocki-prezident budzie ŭsprymać rečy inakš, čym Naŭrocki-kandydat
«Spadar Naŭrocki zajaŭlaŭ, što nie padtrymlivaje ŭstupleńnia Ukrainy ŭ NATA i Jeŭrapiejski sajuz. Ci aznačaje heta, što my ŭbačym novuju dynamiku ŭ adnosinach pamiž Polščaj i Ukrainaj?» — zapytała litoŭskaja žurnalistka.
«Ja pierahavaru ź im pra heta, bo, jak vy viedajecie, maja pazicyja pa hetym pytańni inšaja. Jana vynikaje z majho prezidenckaha dośviedu — amal dziesiaci hadoŭ na pasadzie prezidenta Polščy, jana vynikaje z usich viedaŭ, nazapašanych za hetyja hady, — adkazaŭ Duda.
— Upeŭnieny, što jon taksama ŭvažliva praanalizuje mižnarodnuju situacyju, stanovišča Ukrainy i polska-ŭkrainskija adnosiny, kali zastupić na pasadu. Jak my kažam u Polščy: punkt widzenia zależy od punktu siedzenia, tvaja pazicyja zaležyć ad taho, dzie ty siadziš — a kresła prezidenta Respubliki Polšča vielmi śpiecyfičnaje miesca, i ź jaho śviet vyhladaje trochi inakšym».
Prezident Polščy taksama zaklikaŭ nie dramatyzavać pahrozy z uschodu.
Rasija vydychajecca
«Vosieńniu kala našych miežaŭ projduć vajskovyja vučeńni «Zachad». Paśla anałahičnych vučeńniaŭ u 2021 hodzie Rasija napała na Ukrainu. Jak vy dumajecie, nakolki imavierna, što Rasija vyrašyć atakavać Polšču ci Litvu padčas hetych vučeńniaŭ ci ŭ najbližejšy čas?» — spytała žurnalistka.
«Nie dumaju, što tak, — supakoiŭ Duda. — Viadoma, niechta skaža: «Nikoli nie kažy nikoli», ale my rychtujemsia, umacoŭvajem patencyjał strymlivańnia, madernizujem armiju, kab być u biaśpiecy. Ale najvažniejšaje — heta być upeŭnienymi, što na nas nichto nie napadzie, što hety patencyjał budzie nastolki mahutny, što ni ŭ kaho nie budzie spakusy jaho vyprabavać».
My, skazaŭ Duda, «stanovimsia macniejšymi, a Rasija słabieje, bo štodnia stračvaje svaje ŭzbrojenyja siły ŭ bajach z Ukrainaj, u apošnija dni jana taksama paniesła vialikija straty ŭ vajskovaj technicy i ludziach».
«Kali havaryć pra napad na Ukrainu, Rasija vydychajecca jak u płanie vajskovaj infrastruktury, tak i čałaviečaha faktaru — heta vielmi surjozna», — adznačyŭ prezident Polščy.
«Tamu ja nie dumaju, što siońnia Rasija zdolnaja atakavać jakuju-niebudź inšuju krainu», — padsumavaŭ jon.
Jon taksama adznačyŭ, što spakojna hladzić na pytańnie zachavańnia amierykanskaj prysutnaści ŭ Jeŭropie i havaryŭ z prezidentam Trampam pra stvareńnie mocnaj amierykanskaj vajskovaj bazy ŭ Polščy, jakaja b stała płacdarmam i dla abarony bałtyjskich krain.
Ciapier mihrancki kryzis 2021-ha ŭsprymajecca padrychtoŭkaj da vajny
U toj ža čas jon pryznaŭ, što «Rasija sapraŭdy ažyćciaŭlaje roznyja hibrydnyja ataki — umieła i ŭ samych raznastajnych formach».
«Na maju dumku, da hetaha možna adnieści i ataku na našy miežy, jakuju tearetyčna ažyćciaŭlaje Biełaruś, ale nasamreč my cudoŭna viedajem, chto za joj staić. Chaču vam nahadać, što jana ciahniecca ŭžo šmat hadoŭ — faktyčna z kanca leta 2021 hoda, i z pazicyi siońniašniaha dnia tyja padziei ŭsprymajucca jak padrychtoŭka Rasijaj hleby pierad šyrokamaštabnaj ahresijaj suprać Ukrainy», — skazaŭ jon.
«Ja ŭ samym roskvicie sił jak palityk»
Prezidentam Polščy nielha być bolš za dva terminy: «Kanstytucyja Respubliki Polšča ŭ hetym pytańni adnaznačnaja». «Tamu ja spakojna pieradam prezidenckija paŭnamoctvy svajmu pierajemniku», — kaža jon.
Što Duda budzie rabić paśla prezidenctva? Jon staŭ kiraŭnikom Polščy maładym.
«Mnie 53 hady, i, kali havaryć pra palityku, ja ŭsio jašče małady. Skažam tak, u samym roskvicie sił jak palityk, ja nasamreč daśviedčany palityk, — skazaŭ Duda i nie vyklučyŭ, što zastaniecca ŭ palitycy. — Ja zaŭsiody adkryty, kali niejkim razumnym čynam Polšča zachoča i nadalej skarystacca maimi viedami i majoj hatoŭnaściu pracavać na Respubliku Polšču, na našu nacyju, na naša hramadstva».
U toj ža čas jon nie vyklučyŭ i viartańnia ŭ akademičnuju śfieru.
«Ja šmat hadoŭ adpracavaŭ u Jahiełonskim univiersitecie, maju stupień doktara prava sa śpiecyjalizacyjaj u administracyjnym pravie, dobra znajomy z pytańniami dziaržaŭnaha prava. Šmat hadoŭ pracavaŭ u Kanstytucyjnym sudzie Polščy, maju dośvied vykładańnia va ŭniviersitecie. Tak što maju šmat roznych navykaŭ», — uśmichajecca prezident.
U Vilni čakajuć, što Naŭrocki praciahnie kurs Dudy
U Vilni pieramohu kandydata, padtrymanaha partyjaj «Prava i spraviadlivaść», uspryniali biez dramatyzmu.
Polski pravakansiervatyŭny łahier, da jakoha naležyć Karal Naŭrocki, tradycyjna nadaje bolš uvahi svaim susiedziam pa Uschodniaj Jeŭropie. «Naradoŭcy» ličacca prychilnikami tak zvanaj «jahiełonskaj kancepcyi», zhodna ź jakoj Polšča maje abapiracca na sajuz z narodami, što pražyvajuć miž Rasijaj i Niamieččynaj. Tamu ŭ Vilni raźličvajuć, što asabliva ciesnyja adnosiny, jakija skłalisia miž Andžejem Dudam i prezidentam Litvy Hitanasam Naŭsiedam, zachavajucca i pry novym haspadaru Bielviedera.
Kamientary
Chacia, moža jany za antyrasiejskaść jaho tak nie lubili?
[Zredahavana]