Byłoha ŭčastkovaha z Hancavičaŭ asudzili pa palityčnaj kryminałcy

Uładzimir Stryžyč moh atrymać da šaści hadoŭ kałonii za «ŭvachodžańnie ŭ skład ekstremisckaha farmiravańnia».

Uładzimir Stryžyč. Fota: «Kibierpartyzany»

Uładzimiru Stryžyču 38 hadoŭ. Jon z Hancavičaŭ. U 2010 skončyŭ Mazyrski dziaržaŭny piedahahičny ŭniviersitet imia Šamiakina, a paśla pajšoŭ pracavać u milicyju.

Stryžyč słužyŭ učastkovym i ŭ inśpiekcyi pa spravach niepaŭnaletnich.

Jość u rajoncy «Hancavicki čas» dopisy pra jahonyja zadačy — šukaŭ skradzienaje ŭ kałhasie ziernie, kanfiskavaŭ samahon u buchhałtarki sielskahaspadarčaha pradpryjemstva i hetak dalej. U 2011 hodzie jon z kaleham vystupaŭ u dziciačym domie, a ŭ 2014 udzielničaŭ u konkursie milicejskaj samadziejnaści.

Na konkursie milicejskaj samadziejnaści. Uładzimir Stryžyč druhi z pravaha boku

Stryžyč dasłužyŭsia da staršaha lejtenanta i byŭ zvolnieny ŭ samym kancy 2014 hoda. Pryčyna — «u suviazi sa ździajśnieńniem kiepskaha ŭčynku».

Paśla hetaha Stryžyč adkryŭ IP, śfieraj dziejnaści jakoha paznačanyja lesanarychtoŭki. U telefonnych knihach inšych jon zapisany jak «Uładzimir dreva Niaśviž» i «apiłki Hałynka». IP niadaŭna pačało praces likvidacyi.

Uładzimir Stryžyč padčas słužby ŭ milicyi. Fota ź jahonaj staronki Ukantakcie

Kali byłoha milicyjaniera zatrymali, dakładna nieviadoma, ale nie raniej za vierasień 2024, kali jon apošni raz byŭ anłajn u sacsietkach. Stryžyča asudzili ŭ Bresckim abłasnym sudzie pa č. 3 artykuła 361-1 — «uvachodžańnie ŭ skład ekstremisckaha farmiravańnia». Uładzimiru pahražała da 6 hadoŭ kałonii.

Miarkujučy pa tym, što sud užo adbyŭsia, a Uładzimir nidzie nie źjaviŭsia anłajn, padobna, što jahonaje pakarańnie źviazanaje z pazbaŭleńniem voli. Sutnaść abvinavačańniaŭ nieviadomaja.

Kamientary da artykuła