Stała viadoma, u jakich abłaściach najbolš IP i jurasob, a dzie ich najbolš zakryłasia

Śviežaja statystyka za maj pakazvaje: indyvidualnych pradprymalnikaŭ stanovicca ŭsio mienš, a voś kolkaść jurydyčnych asobaŭ raście. Ale situacyja ŭ roznych rehijonach roznaja.

Pavodle śviežaj statystyki za maj, kolkaść indyvidualnych pradprymalnikaŭ (IP) u Biełarusi praciahvaje źnižacca. Likvidujecca ich amal u dva razy bolš, čym rehistrujecca. Za miesiac było zarehistravana 1388 IP, a likvidavana — 2599.

A voś ź jurydyčnymi asobami (JUA) karcina supraćlehłaja: na 389 likvidavanych prypała 1021 novaja struktura — u siarednim 2,6 novych na kožnuju vydalenuju z rehistra.

Usiaho ŭ krainie ciapier 228 815 indyvidualnych pradprymalnikaŭ i 147 450 jurasobaŭ. 

Minsk i Minskaja vobłaść lidary pa kolkaści subjektaŭ haspadarańnia

U Minsku i Minskaj vobłaści było zarehistravana 553 novych IP — heta amal 40% ad usich novych IP pa krainie.

Pa kolkaści dziejnych IP i JUA stalica i staličny rehijon taksama ŭ lidarach. U joj dziejničaje amal kožny druhi indyvidualny pradprymalnik (44,6%) i bolš za pałovu (56,8%) usich jurydyčnych asobaŭ krainy.

Ale i tut na kožnaha novaha IP prypadaje bolš jak dva likvidavanych — suadnosiny 1 da 2,2. Heta navat horš, čym u siarednim pa krainie, dzie hety pakazčyk składaje 1 da 1,87.

Jaki z rehijonaŭ samy pradprymalnicki, a jaki adstaje?

Kali paraŭnoŭvać kolkaść dziejnych IP na tysiaču žycharoŭ, to samymi pradprymalnymi vyhladajuć Minsk i Minskaja vobłaść — 29,5 IP na 1000 čałaviek. U toj ža čas Viciebskaja vobłaść, jakaja i pa mnohich sacyjalnych pakazčykach adstaje, i tut pakazvaje najhoršy vynik — 19,4 IP na 1000 žycharoŭ.

Situacyja ź jurasobami vyhladaje anałahična: Minsk i Minskaja vobłaść znoŭ na pieršym miescy (24,3 JUA na 1000 čałaviek), a Homielskaja — z najmienšaj ščylnaściu (tolki 10,3 JUA na 1000 nasielnictva).

Krynica: Adziny dziaržaŭny rehistr jurydyčnych asob i indyvidualnych pradprymalnikaŭ

Jak adčuvajuć siabie IP u roznych abłaściach?

Najhoršyja suadnosiny rehistracyi da likvidacyi IP zafiksavanyja znoŭ u Minsku i vobłaści — usiaho 0,45 zarehistravanaha na 1 likvidavanaha. Heta nižej, čym siaredni pakazčyk pa krainie.

Na druhim baku škały — Bresckaja vobłaść, dzie hety pakazčyk značna lepšy: 0,69 IP zarehistravana na 1 likvidavanaha. Heta ŭsio jašče admoŭny bałans, ale najmienš balučy.

Siarod jurydyčnych asobaŭ lidaram u zachavańni pazityŭnaj dynamiki stała Hrodzienskaja vobłaść — na kožnuju likvidavanuju JUA tut było zarehistravana amal 4,6 novych.

A voś najmienš vyhadnaja situacyja ź jurydyčnymi asobami ŭ Homielskaj vobłaści — tolki 1,53 novyja na 1 likvidavanuju.

U cełym u krainie praciahvajecca nastup na indyvidualnych pradprymalnikaŭ, jakich prymušajuć ci likvidavać svaju dziejnaść, ci stvarać jurydyčnyja asoby. 

Kamientary da artykuła