«Było zrazumieła, što i siudy dabiarucca». Ci buduć biełaruskija biznesmieny vydalać svaje profili z «Bajmapki»?
Śledčy kamitet (SK) Biełarusi zajaviŭ, što ŭstanaviŭ asoby bolš za 1000 karystalnikaŭ płatformy «Novaja Biełaruś», i vystaviŭ fihurantam abvinavačvańni. Vyśvietliłasia, što havorka pra prajekty, jakija byli zarehistravanyja na «Bajmapcy» — karcie biełaruskaha biznesu za miažoj. Pradprymalniki rehistravalisia tam jak u katałohu, kab zajavić pra siabie i pryciahnuć patencyjnych klijentaŭ-suajčyńnikaŭ. Vydańnie Most pahutaryła ź biełarusami, jakija raźmiaščali infarmacyju pra svaje biznesy na płatformie, i daviedałasia, što jany płanujuć ciapier rabić.
Farmalna «Bajmapka» źjaŭlajecca inšaj płatformaj. «Luby biznes, da jakoha pryjšli, moža śmieła paćvierdzić, što ničoha nie parušaje i nie maje ničoha ahulnaha z dadatkam «Novaja Biełaruś»/SVAE», — napisaŭ kiraŭnik «Novaj Biełarusi» Pavieł Libier.
Tym nie mienš tym, chto pieražyvaje za svaju biaśpieku, jon prapanavaŭ vydalić svoj biznes — na sajcie «Bajmapki» jość dla hetaha asabisty kabiniet. Ale pradstaŭniki biznesaŭ, ź jakimi źviazaŭsia Most, pastavilisia da takoj idei strymana.
«Emacyjnaj reakcyi na padobnyja źlivy ŭžo nul»
Hanna (imia źmieniena) viadzie nievialiki biznes pa vyrabie aksiesuaraŭ u Biełastoku. Jana ličyć, što pa polskim numary telefona abo pracoŭnym profili ŭ instahramie biełaruskija siłaviki nie zmohuć jaje identyfikavać.
«Ja ŭ Biełaruś viartacca nie źbirajusia, tamu nijakuju infarmacyju vydalać z karty nie budu. Hetaja navina mianie nijak nie tyčycca. I jana kahości ździŭlaje? Było zrazumieła, što rana ci pozna jany i siudy dabiarucca.
Emacyjnaj reakcyi na padobnyja źlivy ŭžo nul. Ščyra kažučy, ja nie bačyła efiektyŭnaści servisu. Tamu nie dumaju, što tam jość niejkaja zvyšstatystyka, zdolnaja ŭ niehatyŭnym klučy paŭpłyvać na biznesmienaŭ, jakija raźmiaščali tam infarmacyju.
Biełarusy, jakija zakazvajuć u mianie vyraby, nie jeździać na radzimu. My ź imi ŭ adnoj łodcy. Tamu papiaredžvać ich, što moj biznes, vierahodna, dzieści moh zaśviacicca, niama sensu».
«Naš strach budzie tolki hrać im na ruku»
Jan i Arciom raźvivali ŭ Hruzii prajekt Liberty Drive — aŭtaškołu, jakaja kansultavała pa atrymańni pravoŭ kiroŭcy ŭ hetaj krainie i rychtavała da zdačy ekzamienu. Ciapier maładyja ludzi ŭ Polščy, a prajekt pracuje tolki anłajn.
Jan kaža, što spačatku nie było razumieńnia, jak rekłamavać biznes, i partniory zarehistravali jaho na «Bajmapcy». A ciapier užo bolš uvahi patencyjnych klijentaŭ pryciahvajuć sacsietki prajekta.
Tym nie mienš, u vydaleńni ŭlikovaha zapisu jon sensu nie bačyć.
«Usio, što jany chacieli, jany ŭžo skapijavali sabie. A heta budzie tolki paturać ich chaciełkam. Naš strach budzie tolki hrać im na ruku. Buduć siadzieć i radavacca, što heta zapałochvańnie pracuje».
Uładalniki biźniesu razvažajuć tolki pra toje, ci varta papiaredžvać klijentaŭ, što jany rehistravali kampaniju na «Bajmapcy».
«Niachaj kadebešniki zachodziać da nas»
Alaksiej raźvivaje turystyčny biznes u Hdańsku. Infarmacyja pra jaho kampaniju taksama jość na «Bajmapcy». Ale niadaŭniaja navina biełarusa nie ŭraziła.
«Nijakaj pahrozy niama. Asabista ja nie maju nijakich stasunkaŭ ź Biełaruśsiu, tak što niachaj jany robiać što zachočuć. Nie zusim razumieju, što jany majuć na ŭvazie, kali kažuć, što ŭstanavili karystalnikaŭ, — tam ža na mapcy i tak jość usia infarmacyja, navat uzłomvać jaje nie treba.
Liču, što asnoŭnaja meta naviny ad SK — zapužać i dematyvavać biełarusaŭ, jakija žyvuć za miažoj. Heta častka hulni biełaruskaj dziaržavy, kali jana viadzie kampaniju i z pašpartami, i z pravami kiroŭcy, kab zrabić horš tym, chto vystupiŭ suprać Łukašenki.
Ja rehistravaŭsia na «Bajmapcy» navat nie z-za klijentaŭ, a kab pakazać, što biełarusy mohuć sami isnavać za miažoj i rabić cikavyja rečy. Heta jak fakt taho, što ludzi mohuć žyć biez dapamohi dziaržavy — i ŭsio ŭ ich dobra atrymlivajecca. Taki pasył dla tych, chto chacieŭ viarnuć biełarusaŭ dadomu, kab paśla pasadzić ich u turmu. Tamu moj profil zastaniecca tam i nadalej. Niachaj kadebešniki zachodziać da nas».
«Jak byccam prymaješ u siabie viečny patok łajna»
U Varšavie Uładzimir raźvivaje biznes, źviazany ź nieruchomaściu. Pra zajavu SK jon raniej nie čuŭ — navinu daviedaŭsia ad žurnalistki Most.
«Ja takim nie cikaŭlusia. Ja žyvu ŭ Polščy i źviartać uvahu na Biełaruś naohuł nie chaču. U Biełarusi ŭvieś čas niešta dy zdarajecca. Sočyš za takimi navinami — i jak byccam prymaješ u siabie viečny patok łajna. A mnie try hady jak raschaciełasia heta rabić.
Mnie składana prakamientavać toje, što zdaryłasia. Ščyra kažučy, ja naohuł ničoha nie dumaju z hetaj nahody».
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary