Byłaja prakurorka Kryma Natalla «Niaš-miaš» Pakłonskaja radykalna źmianiła imidž i ŭdaryłasia ŭ jazyčnictva
Supracoŭnica krymskaj prakuratury Natalla Pakłonskaja ŭ 2014 ustała na bok Rasii i stała adnoj z najbolš viadomych kałabarantak. Z pačatkam vajny va Ukrainie jana trapiła ŭ apału. Apošnim časam Pakłonskaja kruta źmianiła imidž, zrabiła dredy i ahituje viartacca da słavianskich karanioŭ.
Natalla Pakłonskaja. Fota ź jaje telehram-kanała
Natalli Pakłonskaj 45 hadoŭ. Rodam jana z ukrainskaha siała Alaksiejeŭka Łuhanskaj vobłaści Ukrainy. Va Ukrainie jana pracavała ŭ orhanach prakuratury i darasła tam da staršaha prakurora. Ale nie padtrymała Revalucyju hodnaści i była zvolnienaja.
Nieŭzabavie akupacyjnyja ŭłady pryznačyli jaje prakurorkaj Kryma. Na samym pačatku termina jana prasłaviłasia frazaj «nijakich miaš, niaš ja nie dapušču» — heta stała miemam i jaje mianuškaj.
U 2016 Pakłonskuju zvolnili z prakuratury i ŭziali ŭ Dziarždumu.
Natalla Pakłonskaja ŭ dumie. Fota: kremlin.ru
Pieršy raz jana trapiła ŭ apału ŭ vieraśni 2018 hoda, kali była adzinaja, chto z deputataŭ «Adzinaj Rasii» nie padtrymaŭ piensijnuju reformu. Druhi raz i kančatkova — z pačatkam vajny va Ukrainie. 2 sakavika 2022 hoda jana zapisała zvarot z zaklikami spynić vajnu. A ŭ krasaviku 2022 hoda ŭ adnym ź intervju skazała, što «litara Z simvalizuje trahiedyju i hora jak dla Rasii, tak i dla Ukrainy», a dla jaje «važniejšyja ludzi», čym «pieramoha nad ukrainskim nacyzmam». Za heta jaje źniali z bolšaści pasadaŭ.
Pakłonskaja słaviłasia pakaznoj pravasłaŭnaj relihijnaściu. Asabliva aktyŭna jana vystupała za kananizacyju rasijskaha impieratara Mikałaja II. Na jaje stale zaŭždy stajaŭ jahony partret, a ŭ 2017 zajaviła, što biust Mikałaja «zamiratačyŭ». U tym ža 2017-m jana zaciata zmahałasia ź filmam «Macilda» pra apošniaha impieratara Rasii.
Pakłonskaja ź ikonaj Mikałaja II. Fota: «Novaja Hazieta»
Ale ŭ siaredzinie 2024 hoda telehram-kanał Pakłonskaj kruta pamianiaŭsia. Tam vielmi mała palityki, zusim niama pravasłaŭja i vyhladaje jon jak kanał «praśvietlenaj huru». Naprykład, jana vinšavała padpisčykaŭ sa «staražytnym śviatam Łamas».
Pakłonskaja vinšuje ź jazyčnickim śviatam. Skrynšot ź jaje telehram-kanała
A ŭ vieraśni 2024 jana praviała ŭ miežach prajekta «Razmovy pra važnaje» adkryty ŭrok u akupavanaj Chiersonskaj vobłaści. Tam jana, akramia bajek pra žachi majdana, raspaviała školnikam pra «staražytnuju mahiju». Heta narabiła šumu, na jaje nakinulisia pravasłaŭnyja śviatary i telekanał «Spas».
Pakłonskaja ŭ škole ŭ akupavanaj Chiersonskaj vobłaści. Fota: telehram-kanał Natalli Pakłonskaj
Nieŭzabavie jana jašče i adśviatkavała śviata Samajn, jakoje na Zachadzie viadomaje jak Chełaŭin, što taksama narabiła šumu.
Pakłonskaja śviatkuje Samajn. Skrynšot ź jaje telehram-kanała
A niadaŭna byłaja prakurorka jašče kruta źmianiła vobraz — zaplała dredy. Apošniaja publikacyja ŭ jaje kanale pra toje, što nieŭzabavie Kupalle. Tam jana kaža, što heta mahčymaść «uźjadnacca sa svaimi Karaniami, Siłaj i Ahniom». Pra heta, byccam, kažuć padańni i lehiendy staražytnaści, «u jakich schavanaja taja samaja šukanaja praŭda, jakaja pieradałasia nam praz šept prodkaŭ».
Natalla Pakłonskaja. Fota ź jaje telehram-kanała
Čytajcie taksama:
Pakłonskaja: Litara Z simvalizuje trahiedyju i hora jak dla Rasii, tak i dla Ukrainy