Brescki abłvykankam znoŭ zakupajecca suvienirnymi zubrami

Brescki abłvykankam znoŭ patraciŭ biudžetnyja hrošy na draŭlanyja skulptury zubroŭ. Hetym razam było nabyta 20 fihurak ručnoj raboty ź lipy na ahulnuju sumu amal 7 tysiač rubloŭ — prykładna 347 rubloŭ za adnaho zubra. Padobnyja, ale bolšyja skulptury abłvykankam užo kuplaŭ u červieni 2024 hoda — tady za šeść zubroŭ addali bolš za 4,5 tysiačy rubloŭ, piša BG.Media.

Šafy-vitryny z zubrami ŭ Bresckim abłvykankamie. Skrynšot videa

Zhodna z dakumientami tendaru, skulptury majuć 20 sm u vyšyniu i 22 sm u daŭžyniu, zroblenyja jany ź lipy i afarbavanyja ŭ karyčnievyja adcieńni.

Dla čaho nabyvajuć zubroŭ — aficyjna nie tłumačycca, ale, miarkujučy pa papiarednim vopycie, chutčej za ŭsio ich buduć daryć haściam abo raźmiaščać u kabinietach čynoŭnikaŭ.

Tak vyhladaje draŭlany zubr, jaki hetym razam zakupiŭ Brescki abłvykankam

Zubry, jakija Brescki abłvykankam padaryŭ Pałacu Niezaležnaści ŭ Minsku. Fota: Brescki abłvykankam

Tak, naprykład, adnaho z zubroŭ padaryli rasijskamu baksioru Dźmitryju Pirahu, inšyja byli pieradadzienyja Pałacu Niezaležnaści.

Piatro Parchomčyk doryć zubra rasijskamu baksioru Dźmitryju Pirahu. Fota: Brescki abłvykankam

U budynku abłvykankama ŭžo jość niekalki vitryn ź fihurkami zubroŭ, a ciapierašni staršynia Piatro Parchomčyk, jak i jahony papiarednik Juryj Šulejka, źbiraje takuju kalekcyju.

Kalekcyja zubroŭ Juryja Šulejki, kali jon byŭ staršynioj Bresckaha abłvykankama

U krasaviku 2025 hoda na try novyja vitryny dla hetaj kalekcyi vydatkavali jašče bolš za 18 tysiač rubloŭ.

Takim čynam, kupla draŭlanych zubroŭ za dziaržaŭny košt u Breście praciahvajecca — skulptury stanoviacca častkaj tradycyi i svojeasablivaj «vizitoŭkaj» miascovaj ułady.

Kamientary da artykuła