Брэсцкі аблвыканкам зноў закупаецца сувенірнымі зубрамі

Брэсцкі аблвыканкам зноў патраціў бюджэтныя грошы на драўляныя скульптуры зуброў. Гэтым разам было набыта 20 фігурак ручной работы з ліпы на агульную суму амаль 7 тысяч рублёў — прыкладна 347 рублёў за аднаго зубра. Падобныя, але большыя скульптуры аблвыканкам ужо купляў у чэрвені 2024 года — тады за шэсць зуброў аддалі больш за 4,5 тысячы рублёў, піша BG.Media.

Шафы-вітрыны з зубрамі ў Брэсцкім аблвыканкаме. Скрыншот відэа

Згодна з дакументамі тэндару, скульптуры маюць 20 см у вышыню і 22 см у даўжыню, зробленыя яны з ліпы і афарбаваныя ў карычневыя адценні.

Для чаго набываюць зуброў — афіцыйна не тлумачыцца, але, мяркуючы па папярэднім вопыце, хутчэй за ўсё іх будуць дарыць гасцям або размяшчаць у кабінетах чыноўнікаў.

Так выглядае драўляны зубр, які гэтым разам закупіў Брэсцкі аблвыканкам

Зубры, якія Брэсцкі аблвыканкам падарыў Палацу Незалежнасці ў Мінску. Фота: Брэсцкі аблвыканкам

Так, напрыклад, аднаго з зуброў падарылі расійскаму баксёру Дзмітрыю Пірагу, іншыя былі перададзеныя Палацу Незалежнасці.

Пятро Пархомчык дорыць зубра расійскаму баксёру Дзмітрыю Пірагу. Фота: Брэсцкі аблвыканкам

У будынку аблвыканкама ўжо ёсць некалькі вітрын з фігуркамі зуброў, а цяперашні старшыня Пятро Пархомчык, як і ягоны папярэднік Юрый Шулейка, збірае такую калекцыю.

Калекцыя зуброў Юрыя Шулейкі, калі ён быў старшынёй Брэсцкага аблвыканкама

У красавіку 2025 года на тры новыя вітрыны для гэтай калекцыі выдаткавалі яшчэ больш за 18 тысяч рублёў.

Такім чынам, купля драўляных зуброў за дзяржаўны кошт у Брэсце працягваецца — скульптуры становяцца часткай традыцыі і своеасаблівай «візітоўкай» мясцовай улады.

Каментары да артыкула