U Mahilovie złavili pjanaha maršrutčyka, jaki vioz pasažyraŭ
44-hadovaha kiroŭcu maršrutki zatrymali supracoŭniki DAI ŭ Mahilovie. Inśpiektary spynili maršrutnaje taksi z šaściu pasažyrami. Padčas pravierki dakumientaŭ u ich uźnikli padazreńni ŭ suviazi ź fizičnym stanam kiroŭcy, paviedamlaje UUS Mahiloŭskaha abłvykankama.
Skrynšot ź videa
Miedycynskaje abśledavańnie pakazała, što ŭ kryvi mužčyni było 0,7 pramile śpirtu. Na jaho skłali administracyjny pratakoł za kiravańnie transpartam u stanie ałkaholnaha apjanieńnia.
Ciapier jamu treba budzie zapłacić štraf u pamiery 100 bazavych vieličyń (4200 rubloŭ), taksama jon stracić prava kiravać transpartnymi srodkami na 3 hady. Mašyna źmieščana na stajanku pad achovaj.