Hramadzianie Indyi, Vienhryi i Polščy palacieli ŭ kosmas upieršyniu paśla raspadu SSSR
Karabiel Crew Dragon kampanii SpaceX z čatyrma astranaŭtami na borcie nakiravaŭsia da Mižnarodnaj kaśmičnaj stancyi. Čakajecca, što ekipaž praviadzie na stancyi dva tydni, piša «Radyjo Svaboda».
Šubhanšu Šukła, Tybar Kapu, Pehi Uitsan i Słavaš Uznański-Višnieŭski pierad startam. Fota: AP Foto/Terry Renna
Rakieta Falcon 9 startavała ŭnačy na sieradu z kasmadroma ŭ štacie Fłoryda. U skład ekipaža ŭvachodziać:
- vienhierski astranaŭt Tybar Kapu;
- palak Słavaš Uznański-Višnieŭski;
- lotčyk-vyprabavalnik ź Indyi Šubhanšu Šukła;
- a taksama astranaŭtka z ZŠA Pehi Uitsan — dla jaje heta piaty palot.
U toj čas, kali Indyja, Polšča i Vienhryja apošni raz adpraŭlali svaich hramadzian u kosmas, tyja, chto palacieŭ ciapier, jašče navat nie naradzilisia, adznačaje AFP.
Tady jany lacieli ŭ miežach savieckaj prahramy «Interkosmas».
Indyjec Rakieš Šarma byŭ na stancyi «Salut-7» u 1984 hodzie. Takim čynam, Šubhanšu Šukła stanie pieršym indyjcam, jaki pabyvaje na MKS. Ułady Indyi nadajuć jaho palotu vialikuju ŭvahu — čakajecca, što jon vyjdzie na suviaź z premjer-ministram Narendram Modzi z borta stancyi.
Vienhr Biertałan Farkaš lotaŭ u kosmas u 1980 hodzie, palak Mirasłaŭ Hiermašeŭski — u 1978-m. Da siońnia jany zastavalisia adzinymi pradstaŭnikami svaich krain, jakija pabyvali ŭ kosmasie. Abiedźvie krainy na toj momant uvachodzili ŭ zonu ŭpłyvu Savieckaha Sajuza i naležali da vajskova-palityčnaha błoka «Varšaŭskaja damova».