Praŭładnaj błohiercy Andžališy zrabili prapanovu ruki i serca na 3 lipienia

Chłopiec zrabiŭ prapanovu ruki i serca ŭ Hrodnie padčas kancerta ŭ honar 3 lipienia. Ale fanaty Andžališy aburanyja.

Andžališa. Fota tut i dalej: jaje sacsietki

Prasoŭvańniem biełaruskaj błohierki Andžališy zajmajecca kampanija Flagman Music (jana źviazanaja ź niaviestkaj Łukašenki Hannaj Siałuk).

Papularnaja siarod padletkaŭ dziaŭčyna nosić mierč z cytatami Łukašenki, ahituje daterminova iści na vybary i aktyŭna vystupaje na dziaržaŭnych mierapryjemstvach.

Karjera 23-hadovaj Anhieliny Michalovaj (heta sapraŭdnaje imia błohierki) składvajecca nastolki paśpiachova, što letaś jana navat kinuła vučobu ŭ Biełaruskim dziaržaŭnym univiersitecie kultury i mastactvaŭ, kudy ŭ svoj čas pastupiła na kulturołaha-mieniedžara. Hałoŭnaj pryčynaj tady dziaŭčyna nazyvała strach pierad raźmierkavańniem: «Ja vielmi chvalavałasia praz toje, što mianie mohuć kudy-niebudź adpravić adpracoŭvać i maja karjera, jakaja idzie ŭvierch, moža spynicca».

Andžališa razam z razam z Kolem Łukašenkam

Kolkaść padpisčykaŭ u sacsietkach Andžališy praciahvaje pavialičvacca. Ciapier jana maje 3,6 miljona padpisčykaŭ u tyktoku, 2,78 miljona padpisčykaŭ na YouTube, 123 tysiačy ŭ instahramie i 48 tysiač u telehramie.

Padčas śviatočnaha kancerta 3 lipienia ŭ Hrodnie na scenu vyjšaŭ chłopiec Andžališy. Jon spačatku pavinšavaŭ usich z Dniom Niezaležnaści, padaryŭ bukiet u čyrvona-zialonaj abhortcy, potym staŭ na adno kalena — a na fonie byŭ ekran z čyrvona-zialonym ściaham.

Błohierka, choć i vycirała ślozy, usio ž spytała ŭ aŭdytoryi, ci treba joj pahadzicca. Pačuŭšy stanoŭčy adkaz, Andžališa adkazała: «Tak!»

Abrańnikam dziaŭčyny staŭ tyktokier Uład Šuma — jon mienš papularny, maje 74 tysiačy padpisčykaŭ u tyktoku.

Andžališa razam z žanichom — tyktokieram Uładam Šuma

Ale šmat chto z fanataŭ Andžališy aburyŭsia situacyjaj. Anhielina i Uład sustrakalisia raniej, ale letaś razyšlisia, pry tym nie vielmi pryhoža. Dziaŭčyna abvinavačvała chłopca ŭ tym, što jon zabłakavaŭ jaje ŭsiudy i admaŭlaŭsia addavać sabačku, jakoha sam i padaryŭ kachanaj.

Paśla hetaha błohierka pakazvała svoj raman z błohieram Dzim Dzimyčam. Toj navat zrabiŭ Andžališy prapanovu ruki i serca na kancercie ŭ Maskvie, ale tady dziaŭčyna admoviła, a para ŭ chutkim časie paviedamiła pra razryŭ ramantyčnych adnosin. Što nie pieraškadžaje maładym ludziam pracavać razam.

Kamientary da artykuła