Płača, ale jedzie ŭ Kieniju ŭśled za mužam: łukašenkaŭski puł zastaŭsia biez addanaj supracoŭnicy

37-hadovaja Vieranika Buta pracuje na BT, jana karespandentka Ahienctva telenavinaŭ. Pa karjernaj leśvicy jana pajšła ŭ 2020 hodzie — kali mnohija kalehi zvalnialisia ŭ znak pratestu. Ciapier Buta katajecca ŭśled za Łukašenkam i aśviatlaje jaho sustrečy. Adnak nieŭzabavie jaje čakaje vialikaje padarožža, ad jakoha jana, vyhladaje, nie ŭ zachapleńni.

Vieranika Buta naradziłasia ŭ Słonimie. Kaža, što maryła pra karjeru dypłamatki i źbirałasia pastupać na fakultet mižnarodnych adnosin. Ale kali pabačyła ŭ słonimskaj rajoncy abjavu pra pošuk junych karespandentaŭ, to vyrašyła pasprabavać svaje siły ŭ žurnalistycy. Niekalki natatak dziaŭčyny apublikavali — i paniesłasia. Vieranika kaža, što papularnaść udaryła joj u hałavu i jana vyrašyła iści na śpiecyjalnaść «mižnarodnaja žurnalistyka» na fakultet žurnalistyki BDU.

Padčas vučoby Vieranika padpracoŭvała na ANT i dźviuch radyjostancyjach. Kali pytańnie dajšło da raźmierkavańnia, dziaŭčyna vybrała «Radyus FM».

Vieranika zachaplajecca ezaterykaj. Jana śćviardžaje, što heta zorki joj padkazali, što jana adnojčy trapić na telebačańnie. Tamu, kali dziaŭčynu paklikali pracavać u Biełteleradyjokampaniju, jana pahadziłasia.

U 2020 hodzie Vieraniku paklikali ŭ łukašenkaŭski puł. Kaža, što, kali atrymała prapanovu, supraciŭlałasia niedzie paŭhoda — bo nie była ŭpeŭniena, što zdoleje. Ale ŭrešcie pahadziłasia.

Darečy, u tym ža 2020 hodzie Vieranika praz svaju prapahandysckuju pracu i palityčnyja pohlady straciła šmat blizkich, u tym liku najlepšuju siabroŭku. Buta niekali navat jeździła ŭ ZŠA, kab pachryścić jaje dzicia i stać chrosnaj mamaj. Razyšłasia prapahandystka i z kachanym chłopcam.

Letaś jana raspaviała pra svoj niervovy zryŭ na chvali tych padziej u pieradačy «Skažiniemołči» na BT: «Na žal, u hetu balnicu mianie pryviali maje siabry. Heta byli maje znajomyja, siabry, adnahrupniki, byłyja kalehi. Tyja ludzi, jakim ja daviarała. U tym liku heta byŭ i na toj momant moj małady čałaviek. Byli maje blizkija siabry i tyja ludzi, jakija raniej prychodzili ŭ moj dom, da maich baćkoŭ. Heta, napeŭna, bolš za ŭsio mianie padkasiła».

Pavialičyć

Kamunikacyja ź siabroŭkaj urešcie adnaviłasia, a voś z maładym čałaviekam adnosiny skončyli nazaŭsiody. «Mahu skazać jamu vializny dziakuj. Dziakujučy jamu ja zrazumieła, jaki mužčyna pavinien być sa mnoj pobač. I ahułam pierahledzieła svaje pohlady na siamju, na adnosiny», — raskazvała supracoŭnika łukašenkaŭskaha puła.

Pavialičyć

Pytańni z asabistym žyćciom Vieranika ŭžo vyrašyła. U sakaviku 2024 hoda Buta namiakała na svoj raman z dyrektaram kanała «Biełaruś 24» Paŭłam Łazavikom. Maŭlaŭ, u instahramie Vieraniki padazrona šmat ahulnych fota ź im, tamu možna padumać, što jany nie prosta siabrujuć. Dziaŭčyna kamientavała situacyju kakietliva: «Abviarhać nie budu. Ale i paćviardžać taksama».

Ale ŭžo ŭ kastryčniku 2024 hoda Vieranika pabrałasia šlubam ź inšym. Jaje mužam staŭ Dźmitryj Krasoŭski. Ciapier jamu 44 hady.

Apošnija piać hadoŭ Krasoŭski byŭ dyrektaram Nacyjanalnaha ahienctva inviestycyj i pryvatyzacyi, pierad tym pracavaŭ namieśnikam dyrektara departamienta ŭ Ministerstvie ekanomiki. 

Ciapier ža Łukašenka pryznačyŭ jaho pasłom Biełarusi ŭ Kienii.

Pavialičyć

U chutkim časie Krasoŭskamu daviadziecca pierajazdžać na inšy kantynient. Vieranika (ciapier jana pa pašparcie Krasoŭskaja, ale ŭ žurnalistycy zastałasia Butaj) taksama pajedzie razam z mužam u Afryku.

U telesiužecie bačna, jak jana vyciraje ślozy, a jaje muž niejak razhublena kaža:

«Niečakanaść dla nas i vialikija źmieny ŭ žyćci. Pierabudova taho, jak my bačyli dalejšaje naša raźvićcio siamji. Ale… My nie pieršyja, chto z hetym sutykajecca. Ja dumaju, z dapamohaj kaleh my zmožam spłanavać tak bližejšy čas, kab sumiaščać razumny bałans pracy i asabistaha žyćcia».

• 1
• 2
• 68
• 6
• 3
• 1
• 5
• 0