Źjezd KPRF abviaściŭ pamyłkovym dakład Chruščova pra kult asoby Stalina
Partyja KPRF padčas źjezdu, jaki prajšoŭ 5 lipienia ŭ azdaraŭlenčym kompleksie «Śniehiry» ŭ Maskoŭskaj vobłaści, pryniała rezalucyju, u jakoj abviaściła pamyłkovym dakład Mikity Chruščova pra kult asoby Stalina ŭ 1956 hodzie.
Fota: Pavel Bednyakov / AP
U dakumiencie havorycca, što KPRF ličyć nieabchodnym «acanić pamyłkovym i palityčna praduziatym» dakład Mikity Chruščova «Ab kulcie asoby i jaho nastupstvach», pradstaŭleny na zakrytym pasiadžeńni delehataŭ XX źjezdu KPSS 25 lutaha 1956 hoda, piša Rasijskaja słužba Radyjo Svaboda.
Hety dakład byŭ pryśviečany asudžeńniu kultu asoby Stalina, masavamu teroru i złačynstvam druhoj pałovy 1930-ch — pačatku 1950-ch hadoŭ, vina za jakija ŭskładałasia asabista na Stalina. Dakład ličycca pačatkam chruščoŭskaj adlihi.
Akramia taho, padmaskoŭny źjezd KPRF pieravybraŭ 81-hadovaha Hienadzia Ziuhanava staršynioj CK KPRF — jon zajmaje hetuju pasadu z 1993 hoda.
Aficyjnaja nazva samoj partyi była źmieniena na «KPRF — palityčnaja partyja Kamunistyčnaja partyja Rasijskaj Fiederacyi».