22-hadovy kalinoviec Cichan «Franc» Klukač atrymaŭ kantuziju
«Krajni vychad byŭ z ahańkom va ŭsich sensach hetaha słova. Pryviet, čarhovaja kantuzija», — havorycca ŭ telehram-kanale dobraachvotnika, jaki ciapier słužyć u 3-j asobnaj šturmavoj bryhadzie. Siabry na niekalki dzion stracili suviaź z chłopcam, ale, vyhladaje, abyšłosia.
Cichan Klukač. Fota: MOST
Cichan Klukač — kalinoviec i były palitviazień. Jon naradziŭsia i vyras u Bieraści. Palitviaźniem staŭ u 18 hadoŭ, sprabujučy ŭratavać ad źniavoleńnia dziaŭčynu, u jakuju zakachaŭsia.
Tady siabroŭka Cichana, 18-hadovaja Safija Małaševič, razmalavała bałončykam z farbaj sistemu «Rubiež» — ščyty śpiecyjalnych srodkaŭ abharodžvańnia. Cichan na sudzie sprabavaŭ uziać adkaznaść za heta na siabie, choć na videa było vidać, što malavała mienavita dziaŭčyna. Adnak u vyniku kałoniju atrymali i jon, i jana.
Cichan Klukač i Safija Małaševič u sudzie
U źniavoleńni Cichan, samavuk, stvaraŭ pryhožyja malunki.
Na volu chłopiec vyjšaŭ 7 sakavika 2022 hoda i praź niejki čas vyjechaŭ ź Biełarusi.
Tady Rasija akurat była napaŭšy na Ukrainu, i Klukač, zusim małady, paličyŭ svaim abaviazkam pajści na front dobraachvotnikam.
Fota: staronka ŭ fejsbuku Cichana Klukača
Ambudziravańnie Cichana Klukača paśla bajavoha zadańnia. Fota: @franc_belarus