Prapahandystam udałosia sarvać viečarynu pamiaci Łarysy Hienijuš u Minsku

U minskaj halerei «Parason» na vulicy Drazda 8 lipienia miełasia adbycca viečaryna, pryśviečanaja biełaruskaj paetcy Łarysie Hienijuš. Pra jaje žyćciovy i tvorčy šlach mieŭsia raskazać paet i daśledčyk litaratury Michaś Skobła. Adnak hetyja namiery nie zastalisia pa-za ŭvahaj praŭładnych prapahandystaŭ, piša «Jeŭraradyjo». 

Łarysa Hienijuš

Na namier praviadzieńnia viečaryny ŭ svaich telehram-kanałach abrynulisia takija klučavyja prapahandysty, jak Ryhor Azaronak, Ludmiła Hładkaja, Vadzim Hihin, Volha Bondarava dy inšyja.

Praź niejki čas Azaronak z zadavalnieńniem kanstatavaŭ, što abviestka pra viečarynu źnikła.

Łarysa Hienijuš (1910—1983) — biełaruskaja paetka, miemuarystka i hramadskaja dziajačka, jakaja ŭsio žyćcio pryśviaciła słužeńniu Biełarusi. Jana była sakratarom urada BNR u emihracyi, zmahałasia za pravy biełarusaŭ i zachavańnie nacyjanalnaj samaśviadomaści. Za heta paśla Druhoj suśvietnaj vajny jana była aryštavanaja ŭ Prazie, asudžanaja i praviała 8 hadoŭ u savieckim łahiery. Navat paśla vyzvaleńnia nie pryniała savieckaha hramadzianstva, reštu žyćcia pražyła razam z mužam Jankam Hienijušam na jahonaj radzimie ŭ Zelvie.

Kamientary da artykuła