Pamior adzin z architektaraŭ Pierabudovy ŭ SSSR Vadzim Miadźviedzieŭ

U Maskvie pamior adzin z hałoŭnych architektaraŭ Pierabudovy ŭ SSSR, saviecki partyjny dziejač i vučony-ekanamist Vadzim Miadźviedzieŭ. Jamu było 96 hadoŭ, i jon zastavaŭsia apošnim z žyvych členaŭ Palitbiuro CK KPSS, jakoje isnavała da skasavańnia 6-ha artykuła Kanstytucyi SSSR ab kiraŭničaj roli kamunistyčnaj partyi ŭ sakaviku 1990 hoda.

Vadzim Miadźviedzieŭ

Vadzim Miadźviedzieŭ naradziŭsia 29 sakavika 1929 hoda ŭ vioscy Mochańkava Jarasłaŭskaj hubierni. Skončyŭ ekanamičny fakultet Leninhradskaha dziaržaŭnaha ŭniviersiteta, abaraniŭ kandydackuju i doktarskuju dysiertacyi pa ekanamičnaj tematycy.

Praciahły čas zajmaŭ kiraŭničyja pasady ŭ partyjnaj sistemie: byŭ sakratarom Leninhradskaha harkama, namieśnikam zahadčyka adździeła prapahandy CK KPSS, rektaram Akademii hramadskich navuk pry CK KPSS (1978—1983), zahadčykam adździeła navuki i navučalnych ustanoŭ CK (1983—1986), sakratarom CK (1986—1990). U 1988-1990 hadach byŭ členam Palitbiuro CK KPSS, staršynioj Ideałahičnaj kamisii.

Naležaŭ da blizkaha koła Michaiła Harbačova i padtrymlivaŭ demakratyčnyja źmieny ŭ hramadstvie.

Kuryrujučy ŭ CK pytańni ideałohii, Vadzim Miadźviedzieŭ unios značny ŭkład u ideałahičnuju i infarmacyjnuju libieralizacyju: inicyjavaŭ admienu zabarony na peŭnyja vydańni, źniaćcie abmiežavańniaŭ na padpisku, viartańnie ŭ ahulny dostup litaratury sa «śpiecchranaŭ», u tym liku tvoraŭ Alaksandra Sałžanicyna i Lva Trockaha. Udzielničaŭ u padrychtoŭcy aktaŭ pa jurydyčnaj admienie pazasudovych rašeńniaŭ u dačynieńni da represavanych u stalinskija časy. Vosieńniu 1989 hoda inicyjavaŭ zamienu ŭ vyšejšych navučalnych ustanovach kursaŭ historyi KPSS i navukovaha kamunizmu kursam sacyjalna-palityčnaj historyi.

Paśla krachu kamunizmu i raspadu SSSR ad palityčnaj dziejnaści adyšoŭ, pracavaŭ u Instytucie ekanomiki RAN i supracoŭničaŭ z «Harbačoŭ-Fondam».

Vadzim Miadźviedzieŭ paśla śmierci ŭ lutym minułaha hoda byłoha staršyni Savieta ministraŭ SSSR Mikałaja Ryžkova zastavaŭsia adzinym žyvym členam Palitbiuro CK KPSS, abranym u skład hetaha faktyčna klučavoha savieckaha orhana ŭłady jašče da skasavańnia 6-ha artykuła Kanstytucyi SSSR ab kiraŭničaj roli kamunistyčnaj partyi ŭ sakaviku 1990 hoda. Paśla taho Palitbiuro choć i isnavała dalej, až da žniŭnia 1991 hoda, ale svaju raniejšuju rolu straciła. 

Kamientary da artykuła