U Rasii zastreliŭsia ministr transpartu, źniaty z pasady siońnia ranicaj
Były ministr transpartu Rasii Raman Staravojt, jakoha siońnia zvolnili z pasady, napiaredadni zastreliŭsia ŭ padmaskoŭnym Adzincovie, paviedamlajuć bujnyja rasijskija telehram-kanały, jakija majuć suviazi ź siłavikami.
Raniej Staravojt uznačalvaŭ Kurskuju vobłaść z 2018-ha pa maj 2024 hoda. Jahonuju śmierć paćvierdziŭ rasijski Śledčy kamitet:
«Siońnia ŭ Adzincoŭskaj haradskoj akruzie ŭ asabistym aŭtamabili znojdziena cieła byłoha ministra transpartu Rasijskaj Fiederacyi Ramana Uładzimiraviča Staravojta z ahniastrelnym ranieńniem», — skazana ŭ paviedamleńni viedamstva.
Papiaredniaj pryčynaj samahubstva Ramana Staravojta mahło stać rasśledavańnie kryminalnaj spravy ź jaho ŭdziełam. Pavodle źviestak rasijskich telehram-kanałaŭ, čynoŭnika padazravali ŭ machlarstvie ŭ asabliva bujnym pamiery.
Zastreliŭsia jon, miarkujučy pa ŭsim, unačy z 5 na 6 lipienia, jašče da aficyjnaha paviedamleńnia pra adstaŭku, piša «Mieduza».
Pytańni da jaho ŭźnikli z-za dakumientaŭ, padpisanych im u jakaści kiraŭnika apieratyŭnaha štaba Kurskaj vobłaści. U ich išła havorka pra dazvoł Karparacyi raźvićcia vobłaści samastojna rasparadžacca 19 miljardami rasijskich rubloŭ (kala 210 miljonaŭ dalaraŭ) ź biudžetu i vybirać subpadradčykaŭ.
Jość viersija, što Ramana Staravojta źbiralisia zatrymać pa spravie ab kradziažy kala 15 miljardaŭ rasijskich rubloŭ (kala 190 miljonaŭ dalaraŭ) pry budaŭnictvie fartyfikacyjnych zbudavańniaŭ u Kurskaj vobłaści.
Śledstva maje pakazańni suprać Staravojta ad byłoha kiraŭnika karparacyi Uładzimira Łukina i deputata Maksima Vasiljeva, jakija ciapier znachodziacca pad vartaj.
Taksama praviarajecca jaho mahčymaja datyčnaść da parušeńniaŭ pry zakupcy miedykamientaŭ dla abłasnych balnic i da niaŭdałaj transpartnaj reformy ŭ Kursku. Padčas jaho kiraŭnictva była zaklučanaja kancesija na madernizacyju tramvajnaj sietki i zakup novych vahonaŭ, ale prajekt nie byŭ zavieršany — rekanstrujavali tolki častku, damova prypynienaja, a hrošy ŭžo vydatkavanyja.
Ciapier čytajuć
Trahiedyja ŭ Barysaŭskaj balnicy: unučka pacyjenta kaža, što na jaho źviarnuli ŭvahu praz šeść hadzin, kali ŭžo piena pajšła z rota — jon pamior19
Kamientary