Biełaruski viertalot Mi-24 źbiŭ rasijski bieśpiłotnik, jaki lacieŭ va Ukrainu
12 lipienia viertalot Mi-24 VPS Biełarusi atakavaŭ i źniščyŭ rasijski ŭdarny bieśpiłotnik «Hierbiera», jaki lacieŭ u bok Ukrainy.
Ilustracyjny zdymak. Dron «Hierbiera», jaki raźbiŭsia 10 lipienia kala 11:40 pa litoŭskim časie na terytoryi Litvy, u rajonie zakrytaha punkta propusku Šumskas, prykładna za 1 km ad miažy ź Biełaruśsiu
Pra heta hromadske paviedamiła krynica ŭ Hałoŭnym upraŭleńni raźviedki Ministerstva abarony Ukrainy.
Jak adznačaje surazmoŭca, u hety momant u pavietranaj prastory Biełarusi znachodzilisia jak minimum try rasijskija bieśpiłotniki.
Viertalot vojskaŭ supraćpavietranaj abarony Biełarusi padčas vykanańnia zadačy pa kantroli pavietranaj prastory paviedamiŭ ab vyjaŭleńni i źniščeńni ŭdarnaha bieśpiłotnika.
Pavodle infarmacyi našaj krynicy, abłomki źbitaha bieśpiłotnika ŭpali ŭ Homielskaj vobłaści.
Pra toje, što ŭ Homielskim rajonie ŭ noč na 12 lipienia byŭ źbity nieviadomy bieśpiłotnik, paviedamlaŭ «Fłahštok».
Reštki drona ŭpali ŭ rajonie Ziabraŭki kala hadziny nočy. Chto mienavita i jakim sposabam źbiŭ aparat — nieviadoma.
Ukrainskija manitorynhavyja kanały pierad hetym nie paviedamlali pra ŭvarvańnie dronaŭ u pavietranuju prastoru Biełarusi. Heta mahło śviedčyć pra toje, što byŭ źbity małaprykmietny dla ŭkrainskich radaraŭ bieśpiłotnik — naprykład, rasijskaja «Hierbiera».
Za dzień da hetaha, pozna ŭviečary 11 lipienia ŭ Rečyckim rajonie biełaruski źniščalnik sprabavaŭ źbić dron, padobny da rasijskaha šachieda.
Ludzi z roznych rajonaŭ publikavali taksama videa z rasijskimi dronami, što zalacieli ŭ Biełaruś.
«Hierbiera» — lohki, adnarazovy dron-prymanka, pryznačany dla pierahruzki sistem PRA i vyjaŭleńnia pazicyj radarnych kompleksaŭ. Taki aparat moža być abstalavany i nievialikaj bajavoj častkaj.